អង់គ្លេស ឲ្យកងទ័ព ១ ពាន់នាក់បន្ថែមទៀតជួយការពារប្រទេស ណាតូ មួយនេះ

លោក Ben Wallace រដ្ឋមន្ត្រីការពារជាតិអង់គ្លេសបាននិយាយថា ចក្រភពអង់គ្លេសនឹងផ្តល់កងទ័ពបន្ថែមចំនួន ១,០០០ នាក់ទៀតដើម្បីជួយការពារប្រទេសអេស្តូនី ពោលបន្ថែមពីលើកងកម្លាំងដែលមានស្រាប់ចំនួន ២,០០០ នាក់នៅក្នុងរដ្ឋណាតូមួយនេះ ។

ទាហានបន្ថែមមួយចំនួននឹងត្រូវប្រើប្រាស់ដើម្បីបង្កើតទីបញ្ជាការយោធាថ្មី ខណៈដែលនៅសល់នឹងឈរជើងនៅចក្រភពអង់គ្លេសត្រៀមដាក់ពង្រាយ ប្រសិនបើចាំបាច់ ។

វាគឺជាផ្នែកមួយនៃការរួមចំណែករបស់ចក្រភពអង់គ្លេសចំពោះផែនការទាំងមូលរបស់អង្គការណាតូ ដែលបានព្រមព្រៀងគ្នានៅឯកិច្ចប្រជុំកំពូលដ៏សំខាន់មួយក្នុងទីក្រុងម៉ាឌ្រីដ ដើម្បីពង្រឹងការការពាររបស់ខ្លួននៅទូទាំងភាគខាងកើតនៃសម្ព័ន្ធភាព បន្ទាប់ពីការលុកលុយរបស់រុស្ស៊ីលើអ៊ុយក្រែន ។

រដ្ឋមន្ត្រីការពារជាតិរូបនេះ បានប្រាប់អ្នកយកព័ត៌មាននៅខាងក្រៅកិច្ចប្រជុំកំពូលនេះថា នាវាចម្បាំង និងយន្តហោះបន្ថែមត្រូវបានកំណត់ឲ្យប្រើប្រាស់ដើម្បីជួយការពារតំបន់របស់ណាតូ ។

ជាចុងក្រោយលោក Wallace បាននិយាយថា “ឥឡូវនេះយើងបានបែងចែកកងពលតូចដែលនឹងមានចំនួន ១,០០០ នាក់ទៀត ដោយសារតែក្រុមប្រយុទ្ធចំនួន ៣ ត្រៀមត្រឡប់មកចក្រភពអង់គ្លេសវិញ” ៕

ប្រែសម្រួលដោយ ៖ ជីវ័ន្ត

ប្រភព ៖ Sky News

ចុចអាន ៖ អ៊ុយក្រែន បញ្ចេញទិន្នន័យថ្មីចំនួនទាហានស្លាប់ក្នុងសង្គ្រាមរាល់ថ្ងៃ