លោក ត្រាំ សម្ដែងការពេញចិត្ត ចំពោះ​នាយករដ្ឋមន្ត្រី​ថ្មី​របស់​អង់គ្លេស

ប្រធានាធិបតី​អាមេរិក លោក ដូណាល់ ត្រាំ បានប្រកាស​ថា លោកបាន​សន្ទនាតាមទូរសព្ទជាមួយនាយករដ្ឋមន្ត្រីថ្មីរបស់ចក្រភពអង់គ្លេស លោក Andy Burnham ដោយបានពិពណ៌នាការជជែកគ្នា​នោះថាមានភាព «ល្អប្រសើរខ្លាំងណាស់»។

បើតាម​សារព័ត៌មាន Fox News ចុះផ្សាយ​ថ្ងៃទី​២១ ខែ​កក្កដា ឆ្នាំ​២០២៦ លោក ត្រាំ បាន​រៀបរាប់​ថា លោក និងលោក Burnham មានគម្រោងនឹងជួបគ្នាផ្ទាល់ ក្នុងពេល​ដ៏ខ្លីខាងមុខ ដើម្បីពិភាក្សាលើបញ្ហាផលប្រយោជន៍រួម។

ក្នុងអំឡុងជំនួប​តាម​ទូរសព្ទ មេដឹកនាំទាំងពីរ បានពិភាក្សាគ្នាអំពីទំនាក់ទំនងដ៏យូរអង្វែងរវាងសហរដ្ឋអាមេរិក និងចក្រភពអង់គ្លេស បញ្ហាប្រឈមដែលលោក Burnham ត្រូវដោះស្រាយ ក៏ដូចជាការសន្យារបស់អាមេរិក ក្នុងការផ្តល់ការគាំទ្រផងដែរ។ លោក ត្រាំ បានបញ្ជាក់ថា លោកបានពិភាក្សាលើប្រធានបទជាច្រើន រួមទាំងប្រេងនៅសមុទ្រខាងជើង ពាណិជ្ជកម្ម សម្ព័ន្ធភាពយោធា និងកិច្ចខិតខំប្រឹងប្រែង ដើម្បីបោសសម្អាតគ្រាប់មីនពីច្រកសមុទ្រហ័រមូស។

ការិយាល័យរបស់លោក Burnham បានចេញសេចក្តីថ្លែងការណ៍មួយ ដោយបញ្ជាក់ថា លោកនាយករដ្ឋមន្ត្រីទន្ទឹងរង់ចាំស្វាគមន៍លោក ត្រាំ មកកាន់ទីក្រុង Manchester ក្នុងដំណើរទស្សនកិច្ចនាពេលអនាគត។ ភាគីទាំងពីរ បានពិភាក្សាគ្នាលើស្ថានភាពនៅមជ្ឈិមបូព៌ា ខណៈដែលលោក Burnham បានគូសបញ្ជាក់ជាថ្មីនូវការប្តេជ្ញាចិត្តរបស់អង់គ្លេស ក្នុងការធានាសុវត្ថិភាពចរាចរណ៍នាវាចរណ៍ក្នុងច្រកសមុទ្រហ័រមូស ដើម្បីការពារខ្សែសង្វាក់​ផ្គត់ផ្គង់សកល និងកាត់បន្ថយចំណាយសម្រាប់ពលរដ្ឋ។

លោក Burnham ក៏បានសង្កត់ធ្ងន់ផងដែរថា កិច្ចការការពារជាតិ និងសន្តិសុខនៅតែជាអាទិភាពចម្បងរបស់ចក្រភពអង់គ្លេស ហើយនៅលើវិស័យក្នុងស្រុក លោកនឹងជំរុញកិច្ចខិតខំប្រឹងប្រែងឧស្សាហូបនីយកម្មឡើងវិញ ដើម្បីជំរុញកំណើនសេដ្ឋកិច្ចទូទាំងប្រទេស។

សូម​ជម្រាប​ថា ជំនួបនេះ បានកើតឡើងបន្ទាប់ពីលោក Burnham បានក្លាយជានាយករដ្ឋមន្ត្រីទី៧ របស់អង់គ្លេស ក្នុងរយៈពេលមួយទសវត្សរ៍ ដោយបានឡើងកាន់តំណែងជំនួសលោក Sir Keir Starmer។ ទោះបីជាអតីតកាលមេដឹកនាំទាំងពីរ ធ្លាប់បានរិះគន់គ្នាទៅវិញទៅមក ដោយលោក ត្រាំ ធ្លាប់ហៅលោក Burnham ថាមានទស្សនៈសេរីជ្រុល​និយមក៏ដោយ ក៏​ការសន្ទនាលើក​នេះ ត្រូវបានគេមើលឃើញថាជាការចាប់ផ្តើមដ៏វិជ្ជមានមួយ សម្រាប់ទំនាក់ទំនងទ្វេភាគី៕

ប្រែសម្រួល៖ ឈាង