ស្រីលង្កា សុំឲ្យលោក ពូទីន ជួយទិញប្រេងឥន្ធនៈ

ប្រធានាធិបតីស្រីលង្កានិយាយថា លោកបានស្នើសុំឲ្យប្រធានាធិបតីរុស្ស៊ី វ្ល៉ាឌីមៀរ ពូទីន ជួយប្រទេសរបស់គាត់ ក្នុងការនាំចូលប្រេងឥន្ធនៈ ខណៈប្រទេសនេះប្រឈមនឹងវិបត្តិសេដ្ឋកិច្ចអាក្រក់បំផុត ចាប់តាំងពីទទួលបានឯករាជ្យពីចក្រភពអង់គ្លេសនៅឆ្នាំ១៩៤៨។

លោក Gotabaya Rajapaksa បាននិយាយថា លោកមានកិច្ចពិភាក្សាប្រកបដោយផលិតភាព ជាមួយលោក ពូទីន។

សំណើនេះកើតឡើង បន្ទាប់ពីរដ្ឋមន្ត្រីថាមពលរបស់ប្រទេសស្រីលង្កា បានព្រមានកាលពីចុងសប្តាហ៍ថា ប្រទេសនេះអាចនឹងអស់សាំង ក្នុងពេលឆាប់ៗ។

កាល​ពី​ថ្ងៃ​ពុធទី០៦ខែកក្កដា មនុស្ស​រាប់​រយ​នាក់ ​បានចេញតវ៉ា​តាម​ដង​ផ្លូវ​នៃ​រដ្ឋធានី ​កូឡុំបូ ដើម្បី​​ប្រឆាំង​​រដ្ឋាភិបាល។

លោក Rajapaksa បាន​បង្ហោះ Twitter ​ថា “ខ្ញុំ​បាន​ស្នើសុំ​ការ​ផ្តល់​ជំនួយ​ឥណទានរុស្ស៊ី ​ដើម្បី​នាំ​ចូល​ឥន្ធនៈ”។ លោកបន្តថា លោកក៏ស្នើឲ្យចាប់ផ្តើមជើងហោះហើររវាងទីក្រុងមូស្គូ និងកូឡុំបូ ឡើងវិញផងដែរ បន្ទាប់ពីក្រុមហ៊ុនអាកាសចរណ៍រុស្ស៊ី Aeroflot ផ្អាកសេវាកម្មកាលពីខែមុន។

លោកបានបន្ថែមថា “យើងបានឯកភាពគ្នាជាឯកច្ឆ័ន្ទថា ការពង្រឹងទំនាក់ទំនងទ្វេភាគីក្នុងវិស័យនានាដូចជា ទេសចរណ៍ ពាណិជ្ជកម្ម និងវប្បធម៌ គឺជាកត្តាសំខាន់បំផុត ក្នុងការពង្រឹងចំណងមិត្តភាពរវាងប្រជាជាតិទាំងពីរ”។

គួរបញ្ជាក់ថា ប្រទេសនេះ បានទិញប្រេងពីរុស្ស៊ីរួចទៅហើយ ក្នុងរយៈពេលប៉ុន្មានខែថ្មីៗនេះ ដើម្បីជួយជំរុញការផ្គត់ផ្គង់ប្រេងឥន្ធនៈក្នុងអំឡុងពេលមានវិបត្តិ ហើយរដ្ឋាភិបាលបានផ្តល់សញ្ញាថា ខ្លួនមានឆន្ទៈក្នុងការទិញបន្ថែមទៀតពីប្រទេសដែលសម្បូរថាមពល៕

ប្រែសម្រួល៖ Vann Vann

ប្រភព៖ BBC

ចុចអាន៖ ស្រីលង្កា ឲ្យមន្ត្រីរដ្ឋ ឈប់ថែមមួយថ្ងៃទៀតក្នុងមួយសប្តាហ៍ ដើម្បីទៅធ្វើស្រែ