រថយន្តក្រុងប៉ូឡូញ ឆ្ពោះទៅបូស្នៀ ធ្លាក់ផ្លូវនៅក្រូអាស៊ី ស្លាប់និងរបួសមនុស្សជិត ៥០នាក់

មនុស្សចំនួន១២នាក់បានស្លាប់ និង៣០នាក់រងរបួស បន្ទាប់ពីរថយន្តក្រុងដឹកអ្នកធ្វើធម្មយាត្រា បានរអិលធ្លាក់ផ្លូវហាយវេក្នុងប្រទេសក្រូអាស៊ី កាលពីថ្ងៃសៅរ៍ទី០៦ខែសីហា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រោះថ្នាក់ចរាចរណ៍នេះ បានកើតឡើងនៅម៉ោង ៥:៤០ ព្រឹក (ម៉ោងក្នុងស្រុក) នៅចម្ងាយ ៤៨គីឡូម៉ែត្រ ភាគខាងជើងទីក្រុង សាគ្រែប រដ្ឋធានីនៃប្រទេសក្រូអាស៊ី លើផ្លូវហាយវេ A-4 ដែលមានភាពមមាញឹកក្នុងរដូវទេសចរណ៍។

រថយន្តក្រុងបានដឹកមនុស្ស ៤៣នាក់ រួមទាំងអាចារ្យ៣នាក់ និងដូនជី៦នាក់ផងដែរ ឆ្ពោះទៅកាន់ទីសក្ការបូជាកាតូលិកនៅតំបន់ Medjugorje ក្នុងប្រទេសបូស្នៀ។

ប៉ូលិសក្រូអាតបាននិយាយនៅលើ Twitter ថា “យោងតាមព័ត៌មាននៅកន្លែងកើតហេតុ រថយន្តក្រុងនេះមានស្លាកលេខប៉ូឡូញ។ មនុស្ស១១នាក់ ស្លាប់នៅនឹងកន្លែង និងជាច្រើននាក់ទៀតរងរបួស។ អ្នកដំណើរម្នាក់ទៀតស្លាប់នៅក្នុងមន្ទីរពេទ្យ ដែលនាំឲ្យចំនួនសរុបកើនឡើងដល់១២នាក់។

មនុស្ស ៣០ នាក់រងរបួស ហើយរដ្ឋមន្ត្រីមហាផ្ទៃក្រូអាស៊ី Davor Bozinovic និយាយថា ពួកគេខ្លះមានរបួសធ្ងន់។

ទូរទស្សន៍រដ្ឋ HRT របស់ប្រទេសក្រូអាស៊ី បានផ្សាយថា មូលហេតុនៃគ្រោះថ្នាក់នេះ គឺអ្នកបើកបរងងុយដេក ធ្វើឲ្យរថយន្តរេចង្កូតធ្លាក់ចេញពីផ្លូវហាយវេ ចូលទៅក្នុងប្រឡាយ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ កុងតឺន័របុករថយន្តដឹកទំនិញធុនធំ រេចង្កូតចូលផ្ទះលក់បាយ