គណៈប្រតិភូសភាអាមេរិកមួយក្រុមទៀត ទៅដល់ កោះតៃវ៉ាន់ (មានវីដេអូ)

គណៈប្រតិភូ​សភា​អាមេរិក ​បាន​ទៅ​ដល់​កោះ​តៃវ៉ាន់​ កាលពី​ថ្ងៃអាទិត្យ​ទី១៤ខែសីហា សម្រាប់​ដំណើរ​ទស្សនកិច្ច​រយៈពេល​ពីរ​ថ្ងៃ។

ការមកដល់របស់សមាជិកសភា​ បានកើតឡើងមិនដល់ពីរសប្តាហ៍ផង បន្ទាប់ពីដំណើរទស្សនកិច្ចដាច់ដោយឡែកដោយប្រធានសភាលោកស្រី Nancy Pelosi បានជំរុញឲ្យមានសកម្មភាពយោធាដ៏ច្របូកច្របល់នៅក្នុងច្រកសមុទ្រតៃវ៉ាន់ ហើយបានធ្វើឲ្យទំនាក់ទំនងរវាងទីក្រុងវ៉ាស៊ីនតោន និងទីក្រុងប៉េកាំង កាន់តែល្អក់កករ។

ដំណើរ​ទស្សនកិច្ច​ទៅ​ទីក្រុងតៃប៉ិ​ ត្រូវ​បាន​ប្រកាស​ដោយ​វិទ្យាស្ថាន​អាមេរិកាំង​ ប្រចាំនៅ​តៃវ៉ាន់។ វិទ្យាស្ថាន​នេះ ត្រូវបានគេប្រៀបប្រដូចថា ដូចជា​ស្ថានទូត​អាមេរិក ​នៅកោះតៃវ៉ាន់ អ៊ីចឹង។

យោងតាមវិទ្យាស្ថាននេះ, សមាជិកព្រឹទ្ធសភារដ្ឋ Massachusetts មកពីគណបក្សប្រជាធិបតេយ្យលោក Ed Markey គឹជាអ្នកដឹកនាំក្រុមនេះ។ អ្នកតំណាងគណបក្សប្រជាធិបតេយ្យលោក John Garamendi, លោក Alan Lowenthal និងលោក Don Beyer បានអមដំណើរលោក Markey ក៏ដូចជាតំណាងរាស្រ្តមកពីគណបក្សសាធារណរដ្ឋ លោកស្រី Aumua Amata Coleman Radewagen ផងដែរ។

វិទ្យាស្ថាននេះនិយាយថា គណៈប្រតិភូ នឹងជួបជាមួយមេដឹកនាំជាន់ខ្ពស់តៃវ៉ាន់ ដើម្បីពិភាក្សាអំពីទំនាក់ទំនងរវាងសហរដ្ឋអាមេរិក និងតៃវ៉ាន់ បញ្ហាសន្តិសុខក្នុងតំបន់ ពាណិជ្ជកម្ម និងការវិនិយោគ ខ្សែសង្វាក់ផ្គត់ផ្គង់ពិភពលោក ការប្រែប្រួលអាកាសធាតុ និងបញ្ហាសំខាន់ៗផ្សេងទៀតដែលមានផលប្រយោជន៍ទៅវិញទៅមក។

គួរបញ្ជាក់ថា កាលពីដើមខែនេះ ប្រធានសភាអាមេរិក លោកស្រី Pelosi បានធ្វើដំណើរទៅកោះតៃវ៉ាន់ ខណៈទីក្រុងប៉េកាំងយល់ឃើញថា ដំណើរទស្សនកិច្ចរបស់មន្ត្រីកំពូលលំដាប់ទីពីរនៅក្នុងជួររដ្ឋាភិបាលអាមេរិក និងជាសមាជិកនៃគណបក្សនយោបាយដូចគ្នាជាមួយលោកប្រធានាធិបតី Joe Biden រូបនេះ ជាការរំលោភលើគោលការណ៍ចិនតែមួយ។

ដំណើរ​ទស្សនកិច្ច​នេះ ​ត្រូវ​បាន​រដ្ឋ​មន្ត្រី​ការ​បរទេស​ចិន​លោក វ៉ាង យី ចាត់​ទុក​ថា​ជា “រឿងគួរឲ្យអស់សំណើចជាទីបំផុត” ដោយ​លោក​វ៉ាង​បានអះអាង​ថា “អ្នក​ដែល​ប្រមាថ​ចិន​នឹង​ត្រូវ​ទទួល​ទណ្ឌកម្ម”៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ ចិន ព្រមាន តៃវ៉ាន់ ខ្លាំងៗ ក្រុងប៉េកាំង មិនអត់ឱនចំពោះ សកម្មភាពបំបែកខ្លួនណាមួយឡើយ