អាមេរិក ប្រកាសបញ្ជូនសព្វាវុធបន្ថែមទៀត ទៅអ៊ុយក្រែន (មានវីដេអូ)

រដ្ឋមន្ត្រីក្រសួងការពារជាតិអាមេរិក លោក Lloyd Austin បានប្រកាសនៅថ្ងៃព្រហស្បតិ៍ទី០៨ខែកញ្ញានេះថា សហរដ្ឋអាមេរិក នឹងបញ្ជូនសព្វាវុធបន្ថែម សរុបមានទំហំទឹកប្រាក់ ៦៧៥ លានដុល្លារ ទៅឲ្យអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Austin បានធ្វើសេចក្តីប្រកាសបែបនេះ នៅមូលដ្ឋានទ័ពអាកាស Ramstein ក្នុងប្រទេសអាល្លឺម៉ង់ ជាកន្លែងដែលលោកនឹងចូលរួមកិច្ចប្រជុំ នៃក្រុមទំនាក់ទំនងការពារជាតិអ៊ុយក្រែន។

លោក​​និយាយ​ថា ទីក្រុង​កៀវ ​គឺ​ស្ថិត​នៅ​ចំណុច​សំខាន់​មួយ​ទៀត ​ក្នុង​ការ​ប៉ុនប៉ង​ ​ប្រយុទ្ធ​ប្រឆាំង​នឹង​រុស្ស៊ី ហើយ​បាន​ប្តេជ្ញាថា ​អាមេរិកនឹងបន្តជួយ​ក្នុង​រយៈ​ពេល​យូរអង្វែង។

កាលពីសប្តាហ៍មុន សេតវិមានបានស្នើសុំសភាឲ្យបែងចែកទឹកប្រាក់បន្ថែមចំនួន ១១.៧ពាន់លានដុល្លារ ដើម្បីផ្តល់ជំនួយផ្នែកយោធាសម្រាប់អ៊ុយក្រែន រួមទាំងទឹកប្រាក់ ៤.៥ពាន់លានដុល្លារសម្រាប់ការទិញសព្វាវុធ និងឧបករណ៍ផងដែរ។

គួរបញ្ជាក់ថា អាមេរិក​គឺជា​អ្នក​ឧបត្ថម្ភ​ធំ​បំផុត​សម្រាប់​យោធា​អ៊ុយក្រែន ​ចំពេល​មាន​ជម្លោះ​ជាមួយ​រុស្ស៊ី។ ក្នុងចំណោមសព្វាវុធធុនធ្ងន់ដែលមន្ទីរបញ្ចកោណ បញ្ជូនទៅកាន់ទីក្រុងកៀវ រួមមានប្រព័ន្ធរ៉ុកកែតចល័តកម្រិតខ្ពស់ (HIMARS), កាំភ្លើងយន្ត M777 និងយន្តហោះគ្មានមនុស្សបើក៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ អាមេរិក យល់ព្រម លក់ អាវុធឲ្យ តៃវ៉ាន់ ក្នុងទំហំទឹកប្រាក់ ១.១ ពាន់ លាន ដុល្លារ ធ្វើឲ្យចិន ខឹងសម្បា