លោក ស៊ី ជីនពីង ប្រាប់ឲ្យកងទ័ពចិន ផ្តោតលើការត្រៀមខ្លួនធ្វើសង្គ្រាម (មានវីដេអូ)

នៅក្នុងសន្និសីទស្តីពីការការពារជាតិ និងកំណែទម្រង់យោធានៅទីក្រុងប៉េកាំងកាលពីថ្ងៃពុធទី២១ខែកញ្ញា ប្រធានាធិបតីចិនលោក ស៊ី ជីនពីង បានជំរុញឲ្យយោធាចិន ផ្តោតលើការត្រៀមលក្ខណៈសម្រាប់សកម្មភាពយោធា។ នេះបើយោងតាមការចុះផ្សាយរបស់សារព័ត៌មាន Xinhua។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេដឹកនាំចិនបាននិយាយថា “វាចាំបាច់ណាស់ ក្នុងការចម្រាញ់និងអនុវត្តបទពិសោធន៍កំណែទម្រង់ជោគជ័យ ដើម្បីទប់ទល់នឹងស្ថានភាពថ្មី ហើយយល់ពីតម្រូវការនៃភារកិច្ច ផ្តោតលើការរៀបចំធ្វើសង្គ្រាម និងមានភាពក្លាហានក្នុងការរុករក និងច្នៃប្រឌិត”។

ទោះបីជាយ៉ាងណាក៏ដោយ លោក​មិន​បាន​ផ្តល់​ព័ត៌មាន​លម្អិត​បន្ថែម ​អំពីថាតើ​ជម្លោះ​អ្វី​ដែល​លោក​បាន​សំដៅ​ទៅ​លើនោះទេ។

ទីក្រុងប៉េកាំង និងទីក្រុងមូស្គូ នាពេលថ្មីៗនេះ បានធ្វើសមយុទ្ធយោធារួមគ្នា ហើយស្ថានភាពជុំវិញកោះតៃវ៉ាន់ក៏កាន់តែតានតឹងផងដែរ។

គួរបញ្ជាក់ថា សន្និសីទនេះមានការចូលរួមពីតំណាងជាន់ខ្ពស់ នៃក្រុមប្រឹក្សាយោធាមជ្ឈិមរបស់ប្រទេសចិន (CMC), កងជីវពលប្រដាប់អាវុធប្រជាជន និងសាលាយោធា។

CMC គឺជាអ្នកដឹកនាំកងទ័ពរំដោះប្រជាជនចិន និងកងជីវពលប្រដាប់អាវុធប្រជាជន ដោយមានលោក ស៊ី ជីនពីង បានធ្វើជាប្រធានចាប់តាំងពីឆ្នាំ ២០១៣មក៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ TASS, Teletrader

ចុចអាន៖ លោក ស៊ី ថ្កោលទោស បស្ចិមប្រទេស ចំពោះការដាក់ទណ្ឌកម្ម រុស្ស៊ី