យានអវកាសអង្គការ ណាសា ហោះបំបុកអាចម៍ផ្កាយ ទទួលជោគជ័យ (មានវីដេអូ)

យានអវកាសរបស់អង្គការ ណាសា បានហោះបំបុកអាចម៍ផ្កាយឈ្មោះ Dimorphos ប្រកបដោយជោគជ័យ ដែលនេះជាក្តីសង្ឃឹម ក្នុងការជួយសង្គ្រោះភពផែនដី ពីការវាយប្រហារដោយអាចម៍ផ្កាយនាពេលអនាគត។

យានអវកាសបេសកកម្មសាកល្បងបង្វែរទិសដៅអាចម៍ផ្កាយទ្វេរដង ឬ DART បានធ្វើដំណើរទៅដល់គោលដៅអាចម៍ផ្កាយរបស់ខ្លួន ចាប់តាំងពីការបាញ់បង្ហោះក្នុងខែវិច្ឆិកាឆ្នាំ២០២១មក។ កាលពីយប់មិញនេះ វាបានទៅដល់គោលដៅរបស់ខ្លួន ក្នុងល្បឿនប្រហែល ២១ ៥៩៩ គីឡូម៉ែត្រក្នុងមួយម៉ោង។

ទោះបីជាយ៉ាងណាក៏ដោយ យានអវកាសនេះមានទំហំតូចជាងអាចម៍ផ្កាយ Dimorphos ប្រហែល១០០ដងឯណោះ ដូច្នេះវាមិនបានបំផ្លាញអាចម៍ផ្កាយទាំងស្រុងបាននោះទេ ប៉ុន្តែ DART សង្ឃឹមថា ការហោះបំបុកនឹងផ្លាស់ប្តូរល្បឿន និងផ្លូវរបស់អាចម៍ផ្កាយនៅក្នុងលំហ។

ក្រុមអ្នកវិទ្យាសាស្ត្ររំពឹងថា យានអវកាសនេះនឹងផ្លាស់ប្តូរអាចម៍ផ្កាយ Dimorphos បន្តិច ហើយធ្វើឲ្យវាកាន់តែមានទំនាញទៅនឹងអាចម៍ផ្កាយ Didymos ដែលជាអាចម៍ផ្កាយធំជាងនៅក្នុងប្រព័ន្ធ។

ជំហានបន្ទាប់ អ្នកសង្កេតការណ៍នៅលើដី ជុំវិញពិភពលោក នឹងង្កេតមើលប្រព័ន្ធអាចម៍ផ្កាយជាមធ្យោបាយមួយដើម្បីបញ្ជាក់ថាតើ យានអវកាស DART បានផ្លាស់ប្តូរចលនារបស់អាចម៍ផ្កាយដោយជោគជ័យដែរឬក៏អត់។ កែវយឺតអវកាស James Webb, Hubble Space Telescope និងបេសកកម្ម Lucy របស់អង្គការ ណាសា ក៏នឹងសង្កេតមើលលទ្ធផលបន្ទាប់បន្សំផងដែរ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNN

ចុចអាន៖ យានអវកាស Starship របស់ក្រុមហ៊ុន SpaceX ផ្ទុះឆេះ អំឡុងការចុះចត (មានវីដេអូ)