រុស្ស៊ី ប្រកាសលទ្ធផលប្រជាមតិនៅ Donetsk និង Lugansk (មានវីដេអូ)

ប្រជាពលរដ្ឋភាគច្រើននៅសាធារណរដ្ឋប្រជាមានិត Donetsk និង Lugansk បានគាំទ្រគំនិតនៃការរួបរួមជាមួយរុស្ស៊ី។ នេះបើយោងតាមគណៈកម្មការរៀបចំការបោះឆ្នោតក្នុងតំបន់។

នៅ Donetsk, អ្នកបោះឆ្នោតជាង ៩៩% បានគាំទ្រគំនិតនៃការចូលរួមជាមួយប្រទេសរុស្ស៊ី រីឯការធ្វើប្រជាមតិនៅ Lugansk បានបង្ហាញលទ្ធផលស្រដៀងគ្នានេះ ដោយមានអ្នកបោះឆ្នោតជាង ៩៨% បានគាំទ្រការបង្រួបបង្រួម។

យោងតាមអាជ្ញាធរមូលដ្ឋានបានឲ្យដឹងថា នៅក្នុងសាធារណរដ្ឋទាំងពីរ សន្លឹកឆ្នោតទាំងអស់ត្រូវបានរាប់រួចរាល់អស់ហើយ។

ប្រជាមតិ ត្រូវបានធ្វើឡើងនៅក្នុងសាធារណរដ្ឋទាំងពីរ ក៏ដូចជាក្នុងតំបន់ដែលគ្រប់គ្រងដោយទីក្រុងមូស្គូនៅអ៊ុយក្រែនគឺ Zaporozhye និង Kherson ផងដែរ នៅចន្លោះថ្ងៃទី ២៣ ដល់ ២៧ ខែកញ្ញា។ លទ្ធផលនៅ Zaporozhye បង្ហាញពីការគាំទ្រ ៩៣% ឲ្យចូលរួមជាមួយរុស្ស៊ី ខណៈនៅ Kherson គាំទ្រ ៨៧%។

តួ​លេខ​ផ្លូវការ​បង្ហាញ​ថា មានអ្នកចេញទៅបោះឆ្នោតជាង ៨០% នៅក្នុងសាធារណរដ្ឋ​ទាំង​ពីរ ​ដែល​បាន​បំបែក​ខ្លួន​ចេញ​ពីទី​ក្រុងកៀវ ​ក្រោយ​រដ្ឋប្រហារ Maidan ឆ្នាំ២០១៤ និងក្រោយ​ជម្លោះ​នៅ​ភាគ​ខាង​កើត​ប្រទេស​អ៊ុយក្រែន។

ទោះបីជាយ៉ាងណាក៏ដោយ អ៊ុយក្រែន និងអ្នកគាំទ្រលោកខាងលិច បានច្រានចោលការបោះឆ្នោតប្រជាមតិលើការចូលរូមជាមួយរុស្ស៊ីនេះ ថាជាការបោះឆ្នោតដ៏អាម៉ាស់ ហើយប្តេជ្ញាថានឹងមិនទទួលស្គាល់លទ្ធផលឡើយ។

ស្របពេលជាមួយគ្នានោះ ប្រធានាធិបតីអ៊ុយក្រែន លោក Vladimir Zelensky បានព្រមានថា ការបោះឆ្នោតប្រជាមតិរបស់រុស្ស៊ី នឹងធ្វើឲ្យលទ្ធភាពនៃកិច្ចចរចាជាមួយទីក្រុង មូស្គូ ឈានដល់ទីបញ្ចប់មិនអាចស្តារឡើងវិញបាន៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ តំបន់អ៊ុយក្រែនចំនួន៤ ចាប់ផ្តើមធ្វើប្រជាមតិស្តីពីការចូលរួមជាមួយ រុស្ស៊ី ហើយ