តៃវ៉ាន់​ ​ថា ចិន ​កំពុង​សម្លឹង​មើល​សង្រ្គាម​អ៊ុយក្រែន​ ដើម្បី​អភិវឌ្ឍ​យុទ្ធសាស្ត្រ “កូនកាត់” (មានវីដេអូ)

មន្ត្រីសន្តិសុខតៃវ៉ាន់ជាន់ខ្ពស់ បាននិយាយនៅថ្ងៃពុធទី១២ខែតុលានេះថា ប្រទេសចិន កំពុងសម្លឹងមើលបទពិសោធន៍នៃសង្គ្រាមនៅអ៊ុយក្រែន ដើម្បីអភិវឌ្ឍយុទ្ធសាស្ត្រសង្គ្រាមកូនកាត់ ប្រឆាំងនឹងកោះតៃវ៉ាន់ រួមទាំងការប្រើប្រាស់យន្តហោះគ្មានមនុស្សបើក និងសម្ពាធផ្លូវចិត្តផងដែរ។

តៃវ៉ាន់បាននិងកំពុងសិក្សាយ៉ាងយកចិត្តទុកដាក់ អំពីមេរៀននៃសង្គ្រាមអ៊ុយក្រែន ដើម្បីប្រតិកម្ម ប្រសិនបើចិន នៅតែគំរាមកំហែងប្រើប្រាស់កម្លាំងដណ្តើមយកកោះ ដែលគ្រប់គ្រងដោយខ្លួនឯងមួយនេះ។

ប្រទេសចិន បានបង្កើនការធ្វើសមយុទ្ធយោធានៅជុំវិញកោះតៃវ៉ាន់ក្នុងខែសីហា ដើម្បីបង្ហាញពីការខឹងសម្បារបស់ខ្លួន ចំពោះដំណើរទស្សនកិច្ចទៅកាន់ទីក្រុងតៃប៉ិរបស់ប្រធានសភាសហរដ្ឋអាមេរិក លោកស្រី Nancy Pelosi ហើយខ្លួនបានបន្តសកម្មភាពយោធា ចាប់តាំងពីពេលនោះមក។

ថ្លែងនៅក្នុងសភា អគ្គនាយកការិយាល័យសន្តិសុខជាតិតៃវ៉ាន់ លោក Chen Ming-tong បាននិយាយថា ប្រទេសចិនក៏កំពុងយកចិត្តទុកដាក់ ចំពោះអ្វីដែលកំពុងកើតឡើងនៅក្នុងប្រទេសអ៊ុយក្រែនផងដែរ។

លោកបានប្រាប់សមាជិកសភាថា “ឆ្នាំនេះ យោធាកុម្មុយនិស្ត បានខ្ចីពីបទពិសោធន៍នៃសង្រ្គាមរុស្ស៊ី-អ៊ុយក្រែន ដើម្បីបង្កើតសង្រ្គាមកូនកាត់ប្រឆាំងតៃវ៉ាន់ ហើយពង្រឹងការហ្វឹកហ្វឺនប្រយុទ្ធ និងការរៀបចំខ្លួនប្រឆាំងនឹងសត្រូវដែលខ្លាំង”។

លោក Chen បន្តថា បន្ទាប់ពីសមយុទ្ធកាលពីខែសីហារបស់ចិន ទីក្រុងប៉េកាំងបានពង្រីក “តំបន់ពណ៌ប្រផេះ” និងសកម្មភាពកូនកាត់ប្រឆាំងនឹងតៃវ៉ាន់ ជាពិសេសជាមួយនឹងការប្រើប្រាស់យន្តហោះគ្មានមនុស្សបើក ដែលបានហោះហើរទាំងនៅជិតកោះដែលគ្រប់គ្រងដោយតៃវ៉ាន់ ជិតឆ្នេរសមុទ្ររបស់ប្រទេសចិន និងចូលទៅក្នុងតំបន់កំណត់អត្តសញ្ញាណការពារដែនអាកាសរបស់តៃវ៉ាន់។

ទោះបីជាយ៉ាងណាក៏ដោយ ការិយាល័យកិច្ចការតៃវ៉ាន់របស់ចិន មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។ ប្រទេសចិន បានស្តីបន្ទោសតៃវ៉ាន់ចំពោះការកើនឡើងភាពតានតឹង ដោយនិយាយថា ទីក្រុងតៃប៉ិ កំពុងរួមគំនិតជាមួយកងកម្លាំងបរទេស ប្រឆាំងនឹងទីក្រុងប៉េកាំង ដើម្បីលើកកម្ពស់ឯករាជ្យភាពជាផ្លូវការរបស់កោះតៃវ៉ាន់៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ តៃវ៉ាន់ ព្រមាន ចិន ខ្លាំងៗ