អាមេរិកព្រមាន! ចិន អាចវាយយកកោះ តៃវ៉ាន់ នៅឆ្នាំនេះតែម្តង

ឧត្តមនាវីឯកអាមេរិកជាន់ខ្ពស់មួយរូប បាននិយាយកាលពីថ្ងៃពុធទី១៩ខែតុលាថា យោធាអាមេរិក ចាំបាច់ត្រូវត្រៀមខ្លួនឲ្យរួចរាល់ ដើម្បីឆ្លើយតបទៅនឹងការលុកលុយដ៏មានសក្តានុពលលើកោះតៃវ៉ាន់នៅឆ្នាំនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឧត្តមនាវីឯក Michael Gilday ប្រធានប្រតិបត្តិការកងទ័ពជើងទឹកអាមេរិក គឺជាមន្ត្រីជាន់ខ្ពស់ចុងក្រោយគេបង្អស់នៅទីក្រុងវ៉ាស៊ីនតោន ដែលបានលើកឡើងពីការព្រួយបារម្ភថា ប្រធានាធិបតីចិន លោក ស៊ី ជីនពីង អាចមានឆន្ទៈមុតមាំជាងពេលណាៗទាំងអស់ ក្នុងការដណ្តើមយកកោះតៃវ៉ាន់។

ការអត្ថាធិប្បាយរបស់លោក បានកើតឡើង ចំពេលមន្ត្រីសន្តិសុខកំពូលរបស់កោះតៃវ៉ាន់ ព្រមានថា ការប៉ុនប៉ងណាមួយដើម្បីវាយលុកកោះនេះនឹងទទួលបរាជ័យ ហើយប្រែក្លាយប្រទេសចិនឲ្យទៅជាប្រទេសឯកោជាអន្តរជាតិ។

លោក ស៊ី ប្រហែលជា​ទទួល​បាន​អាណត្តិ​ប្រាំ​ឆ្នាំជាលើកទី៣ ​ក្នុង​ការ​ដឹកនាំ​ប្រទេស​ដែល​មាន​ប្រជាជន​ច្រើន​បំផុត​លើ​ពិភពលោកមួយនេះ ដោយលោកបាន​ថ្លែង​សុន្ទរកថាដ៏សំខាន់ ក្នុង​សមាជ​បក្ស​កុម្មុយនិស្ត​​កាល​ពី​ថ្ងៃ​អាទិត្យសប្តាហ៍មុន ដោយពេលនោះ ​លោក​បាន​រំលឹក​ពាក្យ​សច្ចា​របស់​លោក​ថា​ នឹងបង្រួបបង្រួម ឬ​យក​តៃវ៉ាន់​ដោយប្រើកម្លាំង នៅថ្ងៃណាមួយ។

នៅក្នុងកិច្ចពិភាក្សាជាមួយអង្គការមួយ ឧត្តមនាវីឯក Gilday ត្រូវបានសួរអំពីសុន្ទរកថារបស់លោក ស៊ី និងថាតើលោកយល់ស្របទៅនឹងការអត្ថាធិប្បាយដោយឧត្តមនាវីអាមេរិកម្នាក់ទៀត ដែលថាទីក្រុងប៉េកាំងត្រៀមខ្លួនរួចហើយ ដើម្បីដណ្តើមយកកោះតៃវ៉ាន់នៅត្រឹមឆ្នាំ ២០២៧ ដែរឬក៏អត់។

ឧត្តមនាវីឯក Gilday បានប្រាប់អង្គការក្រុមប្រឹក្សាអាត្លង់ទិកថា “វាមិនមែនគ្រាន់តែជាអ្វីដែលប្រធានាធិបតី ស៊ី និយាយនោះទេ។ វាគឺជាអាកប្បកិរិយារបស់ប្រជាជនចិន និងអ្វីដែលពួកគេធ្វើ។ ហើយអ្វីដែលយើងបានឃើញក្នុងរយៈពេល២០ឆ្នាំចុងក្រោយនេះគឺថា ពួកគេបានធ្វើរឿងលឿនជាងការសន្យា។ ដូច្នេះនៅពេលដែលយើងនិយាយអំពីបង្អួចឆ្នាំ២០២៧ នៅក្នុងគំនិតរបស់ខ្ញុំ នោះត្រូវតែជាបង្អួចឆ្នាំ២០២២ ឬអាចជាបង្អួចឆ្នាំ២០២៣”។

គួរបញ្ជាក់ថា ភាពតានតឹងលើបញ្ហាកោះតៃវ៉ាន់ កាន់តែឡើងកម្តៅ បន្ទាប់ពីប្រធានសភាអាមេរិក លោកស្រី Nancy Pelosi ទៅបំពេញទស្សនកិច្ចទីក្រុង តៃប៉ិ ដែលជាហេតុ ធ្វើឲ្យចិន ខឹងសម្បាយ៉ាងខ្លាំង៕

ប្រែសម្រួល៖ Vann Vann

ប្រភព៖ News.com

ចុចអាន៖ អាមេរិក និងតៃវ៉ាន់ ពិភាក្សាផលិតអាវុធរួមគ្នា