រដ្ឋមន្ត្រីការពារជាតិ អាមេរិក ថ្លែងអ្វីខ្លះ ក្នុងជំនួបទ្វេភាគីជាមួយសម្ដេច ទៀ បាញ់

លោក Lloyd Austin រដ្ឋមន្ត្រីការពារជាតិសហរដ្ឋអាមេរិក បានបង្ហោះសារខ្លីមួយនៅលើបណ្ដាញសង្គម Twitter របស់លោក មុនកិច្ចប្រជុំរដ្ឋមន្ត្រីការពារជាតិ អាស៊ាន-បូក ជាមួយសម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិនៃព្រះរាជាណាចក្រកម្ពុជា ។

លោក Austin បានសរសេរបង្ហោះលើ Twitter កាលពីថ្ងៃទី២២ ខែវិច្ឆិកាថា “ខ្ញុំបានជួបជាមួយសម្ដេចពិជ័យសេនា ទៀ បាញ់ រដ្ឋមន្ត្រីក្រសួងការពារជាតិកម្ពុជា នៅខាងក្រៅកិច្ចប្រជុំរដ្ឋមន្ត្រីការពារជាតិ អាស៊ាន-បូក (ADMM-Plus)” ។

នៅក្នុងសារដែលបង្ហោះលើបណ្ដាញ Twitter របស់លោក Austin បានឲ្យដឹងទៀតថា “ខ្ញុំក៏បានស្វាគមន៍ចំពោះគោលជំហរជាគោលការណ៍របស់កម្ពុជា ទាក់ទងនឹងសង្គ្រាមលុកលុយរបស់រុស្ស៊ីនៅអ៊ុយក្រែន ហើយបានសង្កត់ធ្ងន់លើសារៈសំខាន់នៃការចាត់វិធានការដើម្បីការពារអធិបតេយ្យភាពរបស់កម្ពុជាផងដែរ” ។

គួរបញ្ជាក់ថា លោក Lloyd Austin បានអញ្ជើញមកដល់ព្រលានយន្តហោះអន្តរជាតិខេត្តសៀមរាបកាលពីយប់ថ្ងៃទី២១ ខែវិច្ឆិកា ដើម្បីចូលរួមកិច្ចប្រជុំរដ្ឋមន្ត្រីការពារជាតិ អាស៊ាន-បូក លើកទី៩ (9^th ADMM-Plus) និងកិច្ចប្រជុំពាក់ព័ន្ធដែលកម្ពុជាធ្វើជាម្ចាស់ផ្ទះ ពីថ្ងៃទី២១ ដល់ថ្ងៃទី២៣ ខែវិច្ឆិកា ឆ្នាំ២០២២ នៅក្រុងសៀមរាប ខេត្តសៀមរាប ៕

ប្រែសម្រួលដោយ ៖ ជីវ័ន្ត

ប្រភព ៖ Twitter

ចុចអាន ៖ មន្ទីរបញ្ចកោណ ចេញសេចក្តីថ្លែងការណ៍ ក្រោយជំនួបរវាងលោក Lloyd Austin និងរដ្ឋមន្ត្រីការពារជាតិចិន នៅ កម្ពុជា