មហាសេដ្ឋីជប៉ុន រើសបានអ្នករួមដំណើរទៅឋានព្រះចន្ទ ក្នុងនោះមានតារាល្បី ២រូប

ឌីជេ និង តារាចម្រៀង K-pop នឹងធ្វើដំណើរជុំវិញឋានព្រះចន្ទ បន្ទាប់ពីពួកគេត្រូវបានជ្រើសរើសដោយមហាសេដ្ឋីជប៉ុន ឲ្យចូលរួមធ្វើដំណើរក្នុងយានអវកាស SpaceX។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកជំនួញ Yusaku Maezawa បានបង្ហាញក្រុមនាវិករបស់គាត់ នៅថ្ងៃសុក្រទី០៩ខែធ្នូនេះ បន្ទាប់ពីការស្វែងរកជាសកល កាលពីឆ្នាំមុន។

ឌីជេជនជាតិអាមេរិកឈ្មោះ Steve Aoki និងតារាកូរ៉េ TOP គឺជាតារាដែលល្បីឈ្មោះជាងគេបំផុត ក្នុងក្រុមធ្វើដំណើរនេះ។

ការហោះហើរ ដែលគ្រោងធ្វើឡើងនៅឆ្នាំក្រោយ អាចជាការធ្វើដំណើរទៅឋានព្រះចន្ទលើកដំបូងបង្អស់របស់មនុស្ស ចាប់តាំងពីឆ្នាំ១៩៧២មក។

សម្រាប់ការហោះហើរដែលបានគ្រោងទុកនេះ ​យាន​អវកាសនឹង​ធ្វើដំណើរ​ជុំវិញភពចន្ទ ដោយ​ចូល​​ក្នុងរង្វង់​ចម្ងាយ ២០០គីឡូម៉ែត្រនៃផ្ទៃព្រះចន្ទ។ គិតទាំងទៅទាំងមក ការធ្វើដំណើរនេះ នឹងចំណាយពេលប្រាំបីថ្ងៃ។

ក្នុងឆ្នាំ២០១៨ គាត់ត្រូវបានគេដាក់ឈ្មោះថាជាអ្នកដំណើរឯកជនដំបូងគេ ដែលនឹងត្រូវហោះហើរជុំវិញឋានព្រះចន្ទដោយយានអវកាស SpaceX ហើយនិយាយនៅពេលនោះថា គាត់នឹងឧបត្ថម្ភថ្លៃចំណាយសម្រាប់អ្នកដំណើរប្រាំបីនាក់ផ្សេងទៀតនៅលើយាននេះ។

ទោះបីជាយ៉ាងណាក៏ដោយ តម្លៃ​ដែល​លោក Maezawa ​យល់ព្រម​ ​ចំណាយ​សម្រាប់​សំបុត្រ​ទៅ​កាន់​ទីអវកាស ​មិន​ត្រូវ​បាន​គេ​បង្ហាញ​នោះ​ទេ ប៉ុន្តែ​បើ​តាម​លោក Elon Musk ​គឺថា “វាពិតជាថ្លៃណាស់”។

គួរបញ្ជាក់ថា អ្នកផ្សេងទៀតដែលត្រូវធ្វើដំណើររួមមាន៖

• អ្នករាំ និងអ្នកបង្កើតក្បាច់រាំ Yemi A.D (សាធារណរដ្ឋឆេក)
• អ្នកថតរូប Rhiannon Adam (អៀរឡង់)
• អ្នកថតរូបសត្វព្រៃ Karim Iliya (ចក្រភពអង់គ្លេស)
• ផលិតករភាពយន្ត Brendan Hall (សហរដ្ឋអាមេរិក)
• តារាសម្តែង Dev Joshi (ឥណ្ឌា)

ប្រែសម្រួល៖ Vann Vann

ប្រភព៖ BBC

ចុចអាន៖ មហាសេដ្ឋីជប៉ុន ប្រកាសជ្រើសរើសមនុស្ស៨នាក់ ជិះយានអវកាស រួមដំណើរទៅភពព្រះចន្ទ