មន្ត្រី​តៃវ៉ាន់​ លាតត្រដាង​ព័ត៌មាន​លម្អិត ​អំពី​អន្តរកម្ម​ដ៏​កម្រ ​ជាមួយអង្គការ​ណាតូ

នៅថ្ងៃពុធទី១១ខែមករានេះ មន្ត្រីកងទ័ពអាកាសតៃវ៉ាន់ បានបង្ហាញព័ត៌មានលម្អិត អំពីអន្តរកម្មដ៏កម្ររវាងយោធារបស់កោះនេះ ជាមួយអង្គការណាតូ ដោយគាត់ បានរៀបរាប់អំពីរបៀបដែលគាត់ ចូលរួមកម្មវិធីសិក្សារយៈពេល៦ខែជាមួយមន្ត្រីជាន់ខ្ពស់នៅក្នុងប្រទេសអ៊ីតាលី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តៃវ៉ាន់ ដែលចិនអះអាងថាជាទឹកដីរបស់ខ្លួន មិនមានទំនាក់ទំនងការទូតផ្លូវការជាមួយសមាជិកណាតូណាមួយឡើយ ប៉ុន្តែមានទំនាក់ទំនងការពារយ៉ាងជិតស្និទ្ធជាមួយសហរដ្ឋអាមេរិក ដែលជាប្រភពអាវុធអន្តរជាតិដ៏សំខាន់របស់កោះនេះ និងជារដ្ឋសមាជិកធំបំផុតរបស់អង្គការណាតូ។

ថ្លែងទៅកាន់អ្នកសារព័ត៌មានក្នុងដំណើរទៅកាន់មូលដ្ឋានទ័ពអាកាស Hsinchu នៅភាគខាងជើងកោះតៃវ៉ាន់ វរសេនីយ៍ទោ Wu Bong-yeng បាននិយាយថា គាត់បានចូលរួមវគ្គសិក្សារយៈពេល៦ខែនៅមហាវិទ្យាល័យការពារជាតិណាតូ ក្នុងទីក្រុងរ៉ូមកាលពីឆ្នាំ២០២១ ហើយបានវិលត្រលប់មកតៃវ៉ាន់វិញកាលពីខែមករាឆ្នាំមុន។

គាត់បន្ត​ថា “​នេះគឺ​ជា​ការដោះដូរ​ការ​សិក្សា មិន​មែន​ជា​ការ​ដោះដូរយោធា​ទេ។ ពិតណាស់ ពួកគេចង់ដឹង ចង់ឃើញយ៉ាងខ្លាំងអំពីកោះតៃវ៉ាន់។ ពួកគេ ​ត្រូវ​យល់​ពី​ស្ថានភាព​ប្រទេស​របស់​យើង និង​សមត្ថភាព​របស់​យើង”។

ទោះបីជាយ៉ាងណាក៏ដោយ ណាតូមិនបានឆ្លើយតបភ្លាមៗ ចំពោះសំណើសុំការអត្ថាធិប្បាយទេ។

ស្របពេលជាមួយគ្នានោះ ក្រសួងការពារជាតិតៃវ៉ាន់ បានប្រាប់រ៉យទ័រថា លោក Wu មិនមែនជាមន្ត្រីទីមួយ ដែលខ្លួនបានបញ្ជូនទៅមហាវិទ្យាល័យការពារជាតិនោះទេ ប៉ុន្តែគាត់មិន​បញ្ជាក់​លម្អិត​ឡើយ។

ប្រទេសចិន បានបង្កើនសម្ពាធផ្នែកយោធា នយោបាយ និងសេដ្ឋកិច្ចរបស់ខ្លួននៅលើកោះនេះ ក្នុងរយៈពេលបីឆ្នាំចុងក្រោយ ដើម្បីអះអាងការទាមទារអធិបតេយ្យភាពរបស់ខ្លួន ដែលត្រូវបានបដិសេធយ៉ាងខ្លាំងដោយតៃវ៉ាន់។

តៃវ៉ាន់​បាន​ប្តេជ្ញា​ការពារ​ខ្លួន​ ហើយ​និយាយ​ថា ​មាន​តែ​ប្រជាជន​តៃវ៉ាន់​ប៉ុណ្ណោះ​ ដែល​អាច​សម្រេច​អនាគត​របស់​ពួកគេ​បាន៕

ប្រែសម្រួល៖ Vann Vann

ប្រភព៖ Reuters

ចុចអាន៖ តៃវ៉ាន់ សុំឲ្យ អាល្លឺម៉ង់ ជួយ