ប្រធានសភារុស្ស៊ីបានព្រមានថា “សោកនាដកម្មជាសកល” អាចនឹងកើតឡើងសម្រាប់មនុស្សជាតិ ប្រសិនបើលោកខាងលិច នៅតែបន្តផ្គត់ផ្គង់អាវុធដល់អ៊ុយក្រែន។ លោក Vyacheslav Volodin ក៏បានលើកឡើងផងដែរថា ទីក្រុងមូស្គូ អាចសងសឹកដោយអាវុធមានឥទ្ធិពលជាងនេះ ប្រសិនបើទឹកដីរបស់ខ្លួនត្រូវបានគំរាមកំហែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការកត់សម្គាល់របស់លោក Volodin កើតឡើងប៉ុន្មានថ្ងៃ បន្ទាប់ពីកិច្ចប្រជុំនៅឯមូលដ្ឋានទ័ពអាកាសអាមេរិក Ramstein ក្នុងប្រទេសអាល្លឺម៉ង់ ដែលនៅទីនោះ មហាអំណាចលោកខាងលិចបានប្តេជ្ញាបន្តគាំទ្រទីក្រុងកៀវ។

កាល​ពី​ថ្ងៃ​អាទិត្យទី២២ខែមករា លោក Volodin បានបង្ហោះ Telegram ដើម្បីគំរាម​ថា សព្វាវុធ​ដែល​ផ្តល់​ដោយ​សហរដ្ឋ​អាមេរិក និង​ប្រទេស​ជា​សមាជិក​ណាតូ ត្រូវ​បាន​ប្រើ​ដើម្បីវាយ​ប្រហារ​ទីក្រុង​មានជនស៊ីវិល និង​ប៉ុនប៉ង​ដណ្តើម​យក​ទឹកដី​របស់​យើង។ នោះទីក្រុងមូស្គូ​នឹង​ឆ្លើយ​តបជាមួយអាវុធខ្លាំងជាងនេះ។

លោកអះអាងថា មន្ត្រីលោកខាងលិច គួរតែដឹងពីទំនួលខុសត្រូវរបស់ពួកគេក្នុងការបញ្ចៀសនូវសេណារីយ៉ូបែបនេះ។ លោកព្រមានថា “បើពិចារណាលើឧត្តមភាពបច្ចេកវិទ្យានៃសព្វាវុធរុស្ស៊ី អ្នកនយោបាយបរទេសដែលធ្វើការសម្រេចចិត្តបែបនេះចាំបាច់ត្រូវតែយល់ថា នេះអាចបង្កឲ្យមានសោកនាដកម្មជាសកល ដែលនឹងបំផ្លាញប្រទេសរបស់ពួកគេ”។

ដោយដកស្រង់សម្តីមន្ត្រីអាមេរិកអនាមិកជាច្រើននាក់កាលពីថ្ងៃពុធសប្តាហ៍មុន កាសែត New York Times រាយការណ៍ថា ឥឡូវ រដ្ឋបាលលោក បៃដិន ទំនងជាពិចារណាផ្តល់ឲ្យអ៊ុយក្រែននូវសព្វាវុធដែលត្រូវការ ដើម្បីវាយប្រហារគោលដៅនៅគ្រីមៀ។

មេដឹកនាំអ៊ុយក្រែន ទទូចឲ្យដណ្តើមយកមកវិញ នូវទឹកដីទាំងអស់ដែលស្ថិតក្នុងព្រំដែនរបស់ប្រទេស ដែលបានបង្កើតឡើងបន្ទាប់ពីការដួលរលំនៃសហភាពសូវៀតកាលពីឆ្នាំ១៩៩១។ ទីក្រុងកៀវនិយាយថា ខ្លួនបានរៀបចំដើម្បីដណ្តើមយកតំបន់ទាំងនោះមកវិញដោយប្រើកម្លាំង ប្រសិនបើទីក្រុងមូស្គូមិនព្រមបោះបង់ចោល។

ឧបទ្វីប គ្រីមៀ បានក្លាយជាផ្នែកមួយនៃប្រទេសរុស្ស៊ី បន្ទាប់ពីការធ្វើប្រជាមតិកាលពីឆ្នាំ២០១៤ ខណៈតំបន់ចំនួន៤ផ្សេងទៀតបានធ្វើតាមនេះកាលពីឆ្នាំមុន៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ រុស្ស៊ី បញ្ជាក់ ២ចំណុច ដែលលោកខាងលិច អាចដោះស្រាយជម្លោះនៅអ៊ុយក្រែន បាន