ណាតូ ប្រកាសត្រៀមខ្លួនរួចស្រេចអស់ហើយ សម្រាប់ការប្រឈមមុខដាក់គ្នាដោយផ្ទាល់ជាមួយ រុស្ស៊ី (មានវីដេអូ)

នៅក្នុងបទសម្ភាសជាមួយប៉ុស្តិ៍ទូរទស្សន៍ RTP របស់ប្រទេសព័រទុយហ្គាល់, ប្រធានគណៈកម្មាធិការយោធាណាតូ លោក Rob Bauer ប្រកាសថា ប្លុកដែលដឹកនាំដោយសហរដ្ឋអាមេរិកមួយនេះ បានត្រៀមខ្លួនរួចស្រេចអស់ហើយ សម្រាប់ការប្រឈមមុខដាក់គ្នាដោយផ្ទាល់ជាមួយរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្លើយ​តប​នឹង​សំណួរ​ទាក់​ទង​បញ្ហា​នេះ លោក​បាន​បញ្ជាក់​ថា “យើង​ត្រៀម​ខ្លួនរួច​ហើយ”។ លោកបន្ថែម​ថា អង្គការណាតូ នឹង​ឆ្លើយ​តប​ លុះត្រា​តែ​រុស្ស៊ី​ ឆ្លង​កាត់​ខ្សែ​បន្ទាត់​ក្រហម​ដោយ​ការ​លុកលុយ​ប្រទេស​សមាជិក​ណាតូណា​មួយ”។

មន្ត្រី​យោធា​រូបនេះ​បាន​សង្កត់ធ្ងន់ថា ណាតូ​គួរតែ​រៀបចំ​ឲ្យ​បាន​ល្អ​ជាង​នេះ ព្រោះ​បច្ចុប្បន្ន​រុស្ស៊ី​មាន​គំនិត​ផ្តួចផ្តើម​ផ្នែក​យោធា។ លោកនិយាយថា “ការពិតដែលថាសត្រូវរបស់អ្នកមានអាវុធល្អជាងអ្នកនោះ វាមិនមែនជាបញ្ហារបស់សត្រូវទេ។ វាគឺជាបញ្ហារបស់អ្នក”។

កាលពីថ្ងៃសុក្រទី២៧ខែមករា បេសកជនរងរុស្ស៊ីប្រចាំអង្គការសន្តិសុខ និងកិច្ចសហប្រតិបត្តិការនៅអឺរ៉ុប (OSCE) បានព្រមានថា “គោលនយោបាយពង្រីកអាណានិគមនិយមសម័យទំនើបដែលមិនប្រុងប្រយ័ត្នរបស់អាមេរិក បានធ្វើឲ្យអឺរ៉ុប និងប្រហែលជាពិភពលោកទាំងមូល ធ្លាក់ចូលទៅក្នុងជម្លោះដ៏មហន្តរាយ”។

លោក Maksim Buyakevich បានប្រាប់ក្រុមប្រឹក្សាអចិន្ត្រៃយ៍ OSCE ថា អរិភាពជាបន្ត នៃជម្លោះដែលកំពុងកើតនៅអ៊ុយក្រែន អាចឈានចូលទៅក្នុងសង្រ្គាមទ្រង់ទ្រាយធំដែលនឹងមិនមានអ្នកឈ្នះ។

ដោយលើកឡើងពីផែនការរបស់សហរដ្ឋអាមេរិក និងប្រទេសលោកខាងលិចផ្សេងទៀត ក្នុងការបញ្ជូនរថក្រោះប្រយុទ្ធទំនើបរាប់សិបគ្រឿងទៅឲ្យទីក្រុងកៀវ, អ្នកការទូតរូបនេះបានព្រមានថា “មេដឹកនាំសហរដ្ឋអាមេរិក និងរដ្ឋអតិថិជនរបស់អង្គការណាតូ បានខិតកាន់តែជិតបន្ទាត់ក្រហមហើយ”។

ស្របពេលជាមួយគ្នានោះ លោក Buyakevich បានចោទប្រកាន់ទីក្រុងវ៉ាស៊ីនតោន និងសម្ព័ន្ធមិត្តអាមេរិកពីការបង្កើនការប្រឈមមុខដាក់គ្នាផ្នែកយោធាដោយចេតនាក្នុងប្រទេសអ៊ុយក្រែន និងធ្វើឲ្យទីក្រុងកៀវ បើកសកម្មភាពយោធាប្រឆាំងនឹងប្រជាជនរុស្ស៊ី៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ TASS

ចុចអាន៖ អតីតនាយករដ្ឋមន្ត្រីអង់គ្លេស ទម្លាយថា លោក ពូទីន គំរាមធ្វើឃាតគាត់ ដោយប្រើពេលត្រឹម ១នាទី