ដឹងទេ ចាប់ពីដើមឆ្នាំនេះមក កូរ៉េខាងជើង បាញ់មីស៊ីលប៉ុន្មានលើកហើយ?

គិតចាប់ពីដើមឆ្នាំ ២០២៣ រហូតមកដល់ពេលនេះ កូរ៉េខាងជើងបានបាញ់បង្ហោះមីស៊ីលចំនួន ៦ លើកមកហើយ ហើយវាកើតឡើង ស្របពេលដែល​ប្រធានាធិបតី​កូរ៉េ​ខាង​ត្បូងលោក Yoon Suk Yeol និង​នាយក​រដ្ឋមន្ត្រី​ជប៉ុន Fumio Kishida រៀបចំកិច្ច​ប្រជុំ​កំពូល​នៅ​ទីក្រុង​តូក្យូ ។

ចំនួនដ៏ច្រើននេះបានកើតឡើង បន្ទាប់ពីកូរ៉េខាងជើងបានបាញ់បង្ហោះមីស៊ីលផ្លោងផ្សេងទៀតកាលពីថ្ងៃព្រហស្បតិ៍ដែលទំនងជាមានសមត្ថភាពអាចធ្វើដំណើរបានចម្ងាយដល់ទៅ ១៥,០០០ គីឡូម៉ែត្រ ។

ទន្ទឹមនោះ ក្រសួងការពារជាតិជប៉ុន​និយាយ​ថា មីស៊ីល​នេះ​ត្រូវ​បាន​បាញ់​ចេញ​នៅ​ម៉ោង​ប្រហែល ៧ ព្រឹកថ្ងៃព្រហស្បតិ៍​ ពីតំបន់ Sunan ក្បែរ​ក្រុង​ព្យុងយ៉ាង ហើយវាបានហោះហើរលើអាកាសប្រហែល ៧០ នាទី ជាពិសេសធ្វើដំណើរបានចម្ងាយ ១,០០០ គីឡូម៉ែត្រ និងឈានដល់រយៈកម្ពស់ ៦,០០០ គីឡូម៉ែត្រ ។

ក្រសួងប៉ាន់ស្មានថា មីស៊ីលនេះបានធ្លាក់ចូលសមុទ្រជប៉ុន ក្នុងតំបន់មួយដែលមានចម្ងាយប្រហែល ២០០ គីឡូម៉ែត្រភាគខាងលិចនៃកោះ Oshima-oshima ក្នុងខេត្ត Hokkaido ។

ស្របពេលជាមួយគ្នានេះ មុនការបាញ់មីស៊ីលជាហូរហែកាលពីថ្ងៃព្រហស្បតិ៍, កូរ៉េខាងជើងក៏បានបាញ់មីស៊ីលយុទ្ធសាស្ត្រចំនួន ២ គ្រាប់ចេញពីនាវាមុជទឹក ដើម្បីជាការគំរាមកំហែងថ្មីមួយទៀតដល់សហរដ្ឋអាមេរិក និងកូរ៉េខាងត្បូង បន្ទាប់ពីប្រទេសទាំងពីរចាប់ផ្ដើមធ្វើសមយុទ្ធយោធាទ្រង់ទ្រាយធំកាលពីថ្ងៃចន្ទ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ មកដឹង តម្លៃអគ្គិសនីក្នុងមួយគីឡូវ៉ាត់នៅ ឡាវ