Breaking News! មានការផ្ទុះគ្រាប់បែកនៅកន្លែងជួបជុំរបស់នាយករដ្ឋមន្ត្រីជប៉ុន តែគ្មានគ្រោះថ្នាក់ដល់លោកទេ

លោកនាយករដ្ឋមន្រ្តីជប៉ុន Fumio Kishida ត្រូវបានជម្លៀសចេញភ្លាមៗនៅព្រឹកថ្ងៃសៅរ៍នេះ បន្ទាប់ពីគ្រាប់បែកផ្សែងមួយត្រូវបានគេគប់ចូលទៅក្នុងទីលានជួបជុំមួយនៅក្នុងទីក្រុង Wakayama មុនការចាប់ផ្តើមថ្លែងសន្ទរកថារបស់លោក Fumio Kishida។ ក្រោយហេតុការនេះ លោកនាយករដ្ឋមន្រ្តីជប៉ុនត្រូវបានពញ្ជាក់ថា មិនមានគ្រោះថ្នាក់នោះឡើយ។ នេះបើតាមសេចក្តីរាយការណ៍របស់សារព័ត៌មានជប៉ុន NHK។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បុរសជាជនសង្ស័យម្នាក់ត្រូវបានក្រុមប៉ូលីសចាប់ខ្លួនភ្លាមៗនៅក្នុងហេតុការណ៍នេះ ខណៈមនុស្សជាច្រើនត្រូវបានជម្លៀសចេញ ដើម្បីសុវត្ថិភាព។ លោកនាយករដ្ឋមន្រ្តីជប៉ុន Fumio Kishida បានធ្វើដំណើរទៅកាន់ទីក្រុង Wakayama  ដើម្បីធ្វើសន្ទរកថាគាំទ្របេក្ខភាពគណបក្សប្រជាធិបតេយ្យសេរីសម្រាប់ការបោះឆ្នោតអាណត្តិក្រោយដែលគ្រោងធ្វើនៅចុងខែនេះ។ រូបលោកបានចាកចេញពីកន្លែងកើតហេតុដោយគ្មានរងរបួសណាមួយទេ បន្ទាប់ពីហេតុការណ៍កើតឡើងក្នុងពេលដែលលោកកំពុងនិយាយជាមួយបេក្ខជននៃគណបក្សប្រជាធិបតេយ្យសេរី។

ជាការកត់សម្គាល់ ហេតុការណ៍នេះ បានកើតឡើង៩ខែក្រោយការធ្វើឃាត់លោកអតីតនាយករដ្ឋមន្រ្តីជប៉ុន Shinzo Abe ដោយការបាញ់សម្លាប់ជាមួយនឹងកាំភ្លើងកែច្នៃ។ ការធ្វើឃាតនាពេលនោះ គឺក្នុងខណៈដែលលោកកំពុងធ្វើយុទ្ធនាការសម្រាប់គណបក្សប្រជាធិបតេយ្យសេរីនៅក្នុងខែកក្កដា នៅក្នុងខេត្ត Nara ប្រទេសជប៉ុន៕