រ៉ុក្កែត​ដ៏ធំបំផុត​របស់ SpaceX ផ្ទុះឆេះ នៅពេលបាញ់បង្ហោះសាកល្បង​

រ៉ុកកែត Starship ដ៏ធំបំផុតរបស់ SpaceX ត្រូវបានផ្ទុះ​ឆេះនៅលើអាកាស នៅពេលបាញ់បង្ហោះសាកល្បងកាលពីថ្ងៃព្រហស្បតិ៍ ដោយសារបញ្ហាខុសបច្ចេកទេស​គ្រឿងម៉ាស៊ីន ។

រ៉ុកកែតគ្មានមនុស្សបើក Starship ភ្ជាប់ជាមួយនឹងម៉ូទ័រ Raptor ៣៣ គ្រឿង នៅលើប៊ូស្ទ័រ Super Heavy ត្រូវបានបាញ់បង្ហោះចេញផុតពីដីនៅតំបន់ Boca Chica រដ្ឋ Texas ក៏ប៉ុន្តែបានត្រឹមតែ ៤ នាទីប៉ុណ្ណោះ រ៉ុកកែតក៏ត្រូវផ្ទុះនៅមុនពេលដែល Super Heavy ត្រូវផ្តាច់ខ្លួនចេញពីតួយាន Starship ហើយបានធ្លាក់ចូលទៅក្នុងឈូងសមុទ្រម៉ិកស៊ិក ។

ទោះបីជាគ្រាប់រ៉ុក្កែតត្រូវបានផ្ទុះឆេះក៏ដោយ តែលោក Elon Musk បាន​អបអរ​សាទរចំពោះ​ក្រុមការងារ​ SpaceX ដោយ​បាន​លើកឡើង​ថា អ្វីដែល​កើតឡើង​នៅថ្ងៃនេះ​នឹង​ជា​បទពិសោធន៍សម្រាប់​ត្រៀម​រៀបចំ​ការ​បាញ់បង្ហោះ​សាកល្បង​សាជាថ្មីនៅ​ក្នុងរយៈពេល​ប៉ុន្មានខែ​ខាងមុខ ។

គួរបញ្ជាក់ថា រ៉ុកកែត Starship របស់ SpaceX គឺជារ៉ុក្កែតដ៏ធំ និងមានឥទ្ធិពលបំផុតរបស់ពិភពលោក ត្រូវបានរចនាឡើងដើម្បីដឹកជញ្ជូននាវិក និងទំនិញចូលទៅក្នុងគន្លង និងលំហររបស់ផែនដី ។ បន្ថែមពីនេះ SpaceX គ្រោងនឹងធ្វើការជាមួយ NASA ដើម្បីប្រើប្រាស់ Starship ដើម្បីបញ្ជូនមនុស្សទៅឋានព្រះច័ន្ទនាពេលខាងមុខផងដែរ ៕

ប្រែសម្រួលដោយ ៖ នាង រតនៈ

ប្រភព ៖ Sputnik