ស្វាឪនៅសួនសត្វអាមេរិកបង្កើតកូន បង្កការភ្ញាក់ផ្អើល ព្រោះស្មានថាឈ្មោល

កាលពីថ្ងៃព្រហស្បតិ៍ ទី២០ ខែកក្កដា មានហេតុការណ៍គួរឲ្យភ្ញាក់ផ្អើលមួយកើតឡើងនៅសួនសត្វ Columbus ដែលស្វាឪមួយក្បាលស្មានថាភេទឈ្មោល ត្រូវគេប្រទះឃើញបំបៅដោះកូន ។

ស្វាឪនោះមានឈ្មោះថា Sully វារស់នៅសួន Columbus ក្នុងរដ្ឋ Ohio នៃសហរដ្ឋអាមេរិក តាំងពីឆ្នាំ ២០១៩ មកម្ល៉េះ។

កន្លងមកបុគ្គលិកនៅទីនោះគិតថានាងជាស្វាឈ្មោល លុះឃើញនាងកំពុងបំបៅដោះកូនទើបដឹងថាជាសត្វញីសោះ ។

ស្វាឪ Sully មានអាយុទើបតែ ៨ ឆ្នាំប៉ុណ្ណោះ ទោះនាងគ្រប់អាយុបន្តពូជក្ដី ប៉ុន្តែរាងកាយរបស់នាងនៅតែពិបាកបង្ហាញពីប្រដាប់ភេទដើម្បីឲ្យមនុស្សដឹងពីភេទពិតប្រាកដ ។ ម្យ៉ាងទៀត ស្វាឪមិនមានបង្ហាញសញ្ញានៃការពពោះទេ ព្រោះពោះវាធំដូចៗគ្នាទាំងអស់ ។

ទន្ទឹមនេះ អ្នកអភិរក្សសត្វសប្បាយចិត្តណាស់ចំពោះការសម្រាលកូនរបស់ Sully ព្រោះស្វាឪជាសត្វជិតផុតពូជយ៉ាងធ្ងន់ធ្ងរ ហើយកូនស្វាថ្មីជាភេទស្រីទៀតផង ។ អ្នកថែសួនបាននិយាយថា ទារកហាក់ដូចជាមានសុខភាពល្អណាស់ ហើយ Sully ក៏ដើរតួជាម្តាយដ៏ល្អម្នាក់ដែរ ៕

ប្រែសម្រួល៖ វារី

ប្រភព៖ BBC

ចុចអាន៖ ស្វា Coco ចាស់ជាងគេបំផុតនៅអឺរ៉ុប ឈានដល់វ័យ ៥៨ ឆ្នាំហើយ