ប៉ូឡូញ បញ្ជូនកងទ័ពទៅព្រំដែនយ៉ាងប្រញាប់ ក្រោយ ឧទ្ធម្ភាគចក្របេឡារុស រំលោភដែនអាកាសរបស់ខ្លួន

ប្រទេសប៉ូឡូញ បានប្រញាប់ប្រញាល់បញ្ជូនកងទ័ពទៅកាន់ព្រំដែនភាគខាងកើតរបស់ខ្លួន បន្ទាប់ពីចោទប្រកាន់ប្រទេសបេឡារុស ដែលជាសម្ព័ន្ធមិត្តជិតស្និទ្ធបំផុតរបស់រុស្ស៊ី ថា បានបើកឧទ្ធម្ភាគចក្រយោធារំលោភលើដែនអាកាសរបស់ខ្លួន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ យោធាបេឡារុស បានបដិសេធរាល់ការរំលោភបែបនេះ ហើយចោទប្រកាន់ប៉ូឡូញ ដែលជាសមាជិកណាតូនិងជាអ្នកគាំទ្រដ៏ក្លៀវក្លាបំផុតរបស់អ៊ុយក្រែន ក្នុងជម្លោះជាមួយរុស្ស៊ី ថា ប្រើការចោទប្រកាន់នេះជាលេស ដើម្បីបង្ហាញពីភាពត្រឹមត្រូវ នៃការបង្កើតកងទ័ពរបស់ខ្លួន។

យោងតាមក្រសួងការពារជាតិប៉ូឡូញ, កងកម្លាំងនិងធនធានបន្ថែមទៀត រួមទាំងឧទ្ធម្ភាគចក្រប្រយុទ្ធផងដែរ កំពុងត្រូវបានបញ្ជូនទៅព្រំដែន ហើយក៏បានជូនដំណឹងដល់អង្គការណាតូផងដែរ អំពីការរំលោភព្រំដែន ខណៈភារធារីនៃប្រទេសបេឡារុស ក៏ត្រូវបានកោះហៅឲ្យមកពន្យល់ពីបញ្ហានេះផងដែរ ។

ដំបូងឡើយ យោធាប៉ូឡូញបានបដិសេធថា មិនមានការរំលោភព្រំដែនណាមួយកើតឡើងនោះទេ ប៉ុន្តែក្រោយមក បន្ទាប់ពីពិគ្រោះយោបល់ ប៉ូឡូញក៏ធ្វើការចោទប្រកាន់តែម្តង។

យ៉ាងណាមិញ ក្រសួងការពារជាតិបេឡារុស បានបង្ហោះលើ Telegram ថា រដ្ឋាភិបាលទីក្រុងវ៉ាសូវី បានផ្លាស់ប្តូរគំនិតរបស់ខ្លួនអំពីឧប្បត្តិហេតុនេះ ជាក់ស្តែងគឺបន្ទាប់ពីពិគ្រោះជាមួយចៅហ្វាយនាយនៅបរទេស៕

ប្រែសម្រួល៖ Vann Vann

ប្រភព៖ SKY, Guardian

ចុចអាន៖ ប៉ូឡូញ នឹងសាងសង់របងអគ្គិសនីជំនួសបន្លាលួសតាមព្រំដែនជាមួយ រុស្ស៊ី