ប្រទេ​សទាំង ៥ នៅអាស៊ី​នាំចេញអង្ករទៅទីផ្សារពិភពលោកច្រើនជាងគេ

មានតែប្រទេសនៅក្នុងទ្វីបអាស៊ីប៉ុណ្ណោះ ដែលនាំចេញអង្ករច្រើនបំផុតទៅកាន់ទីផ្សារពិភពលោក ហើយក្រៅពីអាស៊ី ក៏នៅមានប្រទេសក្នុងទ្វីបអាមេរិក និងអឺរ៉ុប បាននាំចេញអង្ករដូចគ្នា ប៉ុន្តែក្នុងបរិមាណតិចតួចប៉ុណ្ណោះ ។

សម្រាប់ប្រទេសទាំង ៥ នៅអាស៊ីដែលបាននាំចេញ​អង្ករច្រើនបំផុតទៅកាន់ពិភពលោករួមមាន៖​

១. ឥណ្ឌា​៖​ ជាប្រទេសដែលនាំចេញអង្ករច្រើនបំផុតទៅកាន់ទីផ្សារពិភពលោកដែលមានចំណែករហូតដល់ ៤០ ភាគរយទៅកាន់ ១៤០ ប្រទេស ។ នៅក្នុងឆ្នាំ ២០២២ ឥណ្ឌាបាននាំចេញអង្កររហូតដល់ជាង ២១ លានតោន គិតជាទឹកប្រាក់មានចំនួនជាង ៩.៦៦ ពាន់លានដុល្លារ ។

២. ថៃ៖ ប្រទេសជាប់របងជាមួយកម្ពុជាមួយនេះ ស្ថិតនៅលំដាប់លេខ ២ ​បន្ទាប់ពីឥណ្ឌាជាប្រទេសផ្គត់ផ្គង់ធំបំផុត។​ នៅឆ្នាំ ២០២២ ថៃបាននាំចេញអង្ករក្នុងបរិមាណជាង ៧.៧០ លានតោន ក្នុងទំហំទឹកប្រាក់ជាង ​៤ ពាន់លានដុល្លារ ។

៣. វៀតណាម​៖​ ប្រទេសមួយនេះ​ ជាគូរប្រជែងយ៉ាងស្វិតស្វាញជាមួយថៃ​ ដើម្បីដណ្តើមតំណែង​ចំណាត់ថ្នាក់លេខ ២ ​ពិភពលោក ។ វៀតណាម បាននាំចេញអង្ករ​បរិមាណជាង ៧ លានតោនក្នុងឆ្នាំ ២០២២ កន្លងទៅ ក្នុងទំហំទឹកប្រាក់ជាង ៣.៤៦ ពាន់លានដុល្លារ ខណៈឆ្នាំនេះ វៀតណាម ដាក់គោលដៅនាំចេញរហូតដល់ ៨ លានតោន ។

៤. ប៉ាគីស្ថាន៖​ ប្រទេសដែលមានព្រំប្រទល់ជាប់ឥណ្ឌាមួយនេះ បាននាំចេញអង្ករជាង ៣.៨ ​លានតោនកាលពីឆ្នាំមុន ។​ សម្រាប់ទីផ្សា​រចម្បងរបស់ប្រទេសនេះ គឺ ចិន ម៉ាឡេស៊ី អារ៉ាប់រួម និងកាហ្សាក់ស្ថាន ។

៥. មីយ៉ាន់ម៉ា៖​ សមាជិក​អាស៊ានមួយនេះ បាននាំចេញអង្ករក្នុងបរិមាណជាង​ ២.២ លានតោនក្នុងទំហំទឹកប្រាក់ជាង ៨៥៣ លានដុល្លារ។ សម្រាប់ទីផ្សារចម្បងរបស់មីយ៉ាន់ម៉ា​ គឺចិន ប៊ែលហ្សិក បង់ក្លាដេស និងហ្វីលីពីន។

សម្រាប់ប្រទេសកម្ពុជាវិញ ក៏ស្ថិតនៅក្នុងចំណោមទាំង​ ១០ ដែលបាននាំចេញអង្ករទៅកាន់ទីផ្សារពិភពលោកដូចគ្នា។ រយៈពេលពេញមួយឆ្នាំ ២០២២ កម្ពុជាបាននាំចេញអង្ករទៅកាន់ទីផ្សារអន្តរជាតិបានចំនួន ៦៣៧ ០០៤ តោន និងនាំចេញស្រូវបានចំនួន ៣ ៤៦៧ ៨៨៦ តោន ​ទទួលបានទឹកប្រាក់ជាង ១.២៥៥ លានដុល្លារសហរដ្ឋអាមេរិក។​

ដោយឡែកនៅក្នុងឆ្នាំនេះ អង្ករពិភព​លោក កំពុងតែឡើងថ្លៃ ដោយសារតែឥណ្ឌារឹតបន្តឹងការនាំចេញ ស្របពេលជាមួយកត្តាអាកាសធាតុប្រែប្រួលផងដែរ ៕

ប្រែសម្រួល៖ នាង រតនៈ

ប្រភព៖ Statista