លោក គីម ជុងអ៊ុន ប្តេជ្ញាគាំទ្ររុស្ស៊ី ទប់ទល់ជាមួយ សហរដ្ឋអាមេរិក

អំឡុង​ដំណើរ​ទស្សនកិច្ច​ដ៏​កម្រ​មួយ​ដើម្បី​ជួប​ប្រធានាធិបតី​រុស្ស៊ី​ វ្ល៉ាឌីមៀរ ពូទីន នៅ​ស្ថានីយ​អវកាស​ក្នុង​តំបន់ Amur ចុង​បូព៌ា​ប្រទេស​រុស្ស៊ី, មេដឹកនាំកូរ៉េខាងជើងលោក គីម ជុងអ៊ុន បានប្តេជ្ញាគាំទ្ររុស្ស៊ី ចំពោះការប្រឈមមុខដាក់គ្នាជាមួយសហរដ្ឋអាមេរិកនិងសម្ព័ន្ធមិត្តរបស់ខ្លួន។

លោក គីម និយាយកាលពីថ្ងៃពុធទី១៣ខែកញ្ញាថា “ប្រទេសរុស្ស៊ី បានក្រោកឡើងសម្រាប់ការប្រយុទ្ធដ៏អង់អាចដើម្បីការពារអធិបតេយ្យជាតិនិងសុវត្ថិភាពរបស់ខ្លួន ប្រឆាំងកងកម្លាំងអនុត្តរភាព។ យើងនឹងឈរជាមួយគ្នាជានិច្ច ដើម្បីប្រឆាំងចក្រពត្តិនិយម”។

មេដឹកនាំកូរ៉េខាងជើងបញ្ជាក់ថា ការអភិវឌ្ឍទំនាក់ទំនងកូរ៉េខាងជើង-រុស្ស៊ី គឺឆ្លើយតបនឹងផលប្រយោជន៍របស់ប្រទេស ហើយទីក្រុងព្យុងយ៉ាងមានបំណងកសាងទំនាក់ទំនងរយៈពេលវែងជាមួយទីក្រុងមូស្គូ ។

ក្នុងដំណើរទស្សនកិច្ចនោះ មន្ត្រី​កូរ៉េខាងជើង ​ត្រូវ​បាននាំ​ទៅ​ទស្សនា​កន្លែង​បាញ់​បង្ហោះ​យានអវកាស​ ដែលភាគីរុស្ស៊ីអះអាងថា ជាទីតាំងមិនធម្មតា។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា ក្រោយការចរចារវាងគណៈប្រតិភូរុស្ស៊ីនិងកូរ៉េខាងជើង លោកពូទីននិងលោក គីម ក៏​ជួបពិភាក្សា​ទល់មុខគ្នា​ផងដែរ។

ទោះបីជាយ៉ាងណាក៏ដោយ ​មុន​ដំណើរ​ទស្សនកិច្ច​ផ្លូវរដ្ឋនេះ មន្ត្រី​អាមេរិក​បាន​ព្រមាន​លោក គីម កុំ​ឲ្យ​លក់​អាវុធ​ដល់​រុស្ស៊ីឲ្យសោះ ថ្វីបើទាំងទី​ក្រុងមូស្គូ និង​​ព្យុងយ៉ាង សុទ្ធតែមិន​បាន​បង្ហាញ​ចេតនា បែបនេះក៏ដោយ។

គួរបញ្ជាក់ថា នេះគឺជាជំនួបកំពូលលើកទី ២ រវាងលោក គីម និងលោក ពូទីន បន្ទាប់ពីមេដឹកនាំទាំងពីបានជួបគ្នាម្ដងរួចទៅហើយនៅឆ្នាំ ២០១៩ ក្នុងដំណើរទស្សនកិច្ចលើកចុងក្រោយរបស់លោក គីម នៅក្រៅប្រទេស ក្រោយពិភពលោកជួបប្រទះវិបត្តិជំងឺរាតត្បាតកូវីដ ១៩៕

ប្រែសម្រួល៖ Vann Vann

ប្រភព៖ RT

ចុចអាន៖ សេចក្តីថ្លែងការណ៍សំខាន់ៗ ៥ ចំណុចក្នុងជំនួបលោក ពូទីន និង គីម ជុងអ៊ុន