ស៊ូដង់ ផ្ទុះជំងឺកាចសាហាវ សម្លាប់កុមារអាយុក្រោម៥ឆ្នាំ ជាង១២០០នាក់

អង្គការសហប្រជាជាតិ (UN) និងអង្គការសុខភាពពិភពលោក (WHO) បាននិយាយថា កុមារអាយុក្រោម៥ឆ្នាំជាង១២០០នាក់ បានស្លាប់ក្នុងជំរំជនភៀសខ្លួន នៅប្រទេសស៊ូដង់ដែលហែកហួរដោយសង្រ្គាម ចន្លោះពាក់កណ្តាលខែឧសភាដល់ខែកញ្ញា ដោយសារការរួមបញ្ចូលគ្នាដ៏សាហាវ នៃការផ្ទុះឡើងជំងឺកញ្ជ្រឹលនិងកង្វះអាហារូបត្ថម្ភធ្ងន់ធ្ងរ។

ទីភ្នាក់ងារជនភៀសខ្លួនអង្គការសហប្រជាជាតិ (UNHCR) និង WHO បាននិយាយនៅក្នុងសេចក្តីថ្លែងការណ៍រួមមួយកាលពីថ្ងៃអង្គារទី១៩ខែកញ្ញាថា ការស្លាប់ទាំងនេះ បានកើតឡើងនៅក្នុងរដ្ឋ White Nile។ អង្គការទាំងពីរ ក៏បញ្ជាក់ឡើងវិញផងដែរ ពីក្តីព្រួយបារម្ភរបស់ពួកគេអំពីស្ថានភាពសុខភាពកាន់តែអាក្រក់ទៅៗ នៅក្នុងប្រទេសអាហ្វ្រិកនេះដោយសារការប្រយុទ្ធគ្នារវាងក្រុមកងទ័ពគូប្រជែង ចាប់តាំងពីខែមេសាមក។

លើសពីនេះ យោងតាម UNHCR, ករណីសង្ស័យជាង៣១០០ នៃជំងឺកញ្ជ្រឹល និងកង្វះអាហារូបត្ថម្ភខ្ពស់ ក៏ដូចជាករណីសង្ស័យជំងឺអាសន្នរោគជាង៥០០ផងដែរ ត្រូវបានរាយការណ៍នៅក្នុងតំបន់ផ្សេងទៀតនៃប្រទេស។

បញ្ហាមន្ទីរពេទ្យខ្សោយសមត្ថភាពដោយសារកង្វះបុគ្គលិក ឱសថសង្គ្រោះជីវិត និងឧបករណ៍សំខាន់ៗ ក៏ដូចជាការវាយប្រហារម្តងហើយម្តងទៀតលើមន្ទីរពេទ្យនិងក្រុមគ្រូពេទ្យ បានចោទជាបញ្ហាប្រឈមកាន់តែធ្ងន់ធ្ងរដល់ការផ្តល់សេវា ធ្វើឲ្យជំងឺកាន់តែធ្ងន់ធ្ងរ និងមានអ្នកស្លាប់កាន់តែច្រើន។

អគ្គនាយក WHO លោក Tedros Adhanom Ghebreyesus បាននិយាយថា បុគ្គលិកសុខាភិបាលក្នុងតំបន់ ដោយមានជំនួយពីអង្គការសុខភាពពិភពលោកនិងដៃគូរបស់ខ្លួន កំពុងខិតខំប្រឹងប្រែងគ្រប់បែបយ៉ាងនៅក្រោមលក្ខខណ្ឌដ៏លំបាក ដើម្បីការពារការស្លាប់កាន់តែច្រើន និងការកើនឡើងនៃជម្លោះ។ ពួកគេត្រូវការការគាំទ្រពីសហគមន៍អន្តរជាតិយ៉ាងខ្លាំង ដើម្បីទប់ស្កាត់ការស្លាប់បន្ថែមទៀត និងការរីករាលដាលមេរោគ។ យើងសូមអំពាវនាវឲ្យម្ចាស់ជំនួយមានចិត្តសប្បុរស និងភាគីសង្រ្គាម ត្រូវការពារបុគ្គលិកសុខាភិបាល និងអនុញ្ញាតឲ្យអ្នកជំងឺ ទទួលបានការព្យាបាល។

គួរបញ្ជាក់ជាថ្មី ជម្លោះដែលផ្ទុះឡើងរវាងកងកម្លាំងប្រដាប់អាវុធស៊ូដង់ (SAF) និងកងកម្លាំងគាំទ្ររហ័ស (RSF) កាលពីថ្ងៃទី១៥ខែមេសា បានសម្លាប់មនុស្សជាង៧០០០នាក់ រួចទៅហើយ៕

ប្រែសម្រួល៖ Vann Vann

ប្រភព៖​ RT

ចុចអាន៖ WHO ព្រមានពីហានិភ័យនៃគ្រោះថ្នាក់ជីវសាស្ត្រនៅ ស៊ូដង់ ក្រោយភាគីប្រយុទ្ធ កាន់កាប់មន្ទីរពិសោធន៍