ប្រជាជននៅហ្គាហ្សាចាប់ផ្តើមចលាចល ដោយនាំគ្នាសម្រុកចូលឃ្លាំងស្តុក លួចយកជំនួយ

មនុស្សរាប់ពាន់នាក់នៅហ្គាហ្សា បានសម្រុកចូលឃ្លាំងស្តុកជំនួយ ដើម្បីដណ្តើមយកគ្រឿងផ្គត់ផ្គង់ នៅក្នុងអ្វីដែលអង្គការសហប្រជាជាតិហៅថាជា “សញ្ញាដ៏គួរឲ្យព្រួយបារម្ភនៃសណ្តាប់ធ្នាប់ស៊ីវិលដែលចាប់ផ្តើមបែកបាក់ហើយ”។

ទីភ្នាក់ងារជំនួយរបស់អង្គការសហប្រជាជាតិសម្រាប់ប៉ាឡេស្ទីន (UNRWA) បាននិយាយថា ឃ្លាំងផ្ទុកទំនិញមូលដ្ឋានដូចជាម្សៅ និងសាប៊ូ ត្រូវបានប្រជាជនចូលលុកលុយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពី UNRWA, ដេប៉ូធំទីពីររបស់ខ្លួន ដែលមានទីតាំងនៅ Deir al-Balah កណ្តាលតំបន់ហ្គាហ្សាស្ទ្រីប គឺត្រូវបានគេកំណត់គោលដៅកាលពីថ្ងៃសៅរ៍ទី២៨ខែតុលា ខណៈទីនោះមានផ្ទុកជំនួយមនុស្សធម៌ភាគច្រើន ដែលផ្តល់ដោយអង្គការសហប្រជាជាតិ។ ទីភ្នាក់ងារដដែលបន្តថា មនុស្សបាននាំគ្នាលួចយកម្សៅ ស្រូវសាលី និងឧបករណ៍អនាម័យ បន្ទាប់ពីការលុកលុយ។

ដំណឹង​នេះ ​កើត​ឡើង​ខណៈ​អ៊ីស្រាអែល​ បង្កើន​សកម្មភាព​យោធា​ប្រឆាំង​ក្រុម​ហាម៉ាស​នៅ​តំបន់ហ្គាហ្សា។

UN និយាយថា ជាងពាក់កណ្តាលនៃប្រជាជន២.៤លាននាក់របស់ជ្រោយហ្គាហ្សា ត្រូវផ្លាស់ទីលំនៅ ហើយអគាររាប់ពាន់ត្រូវបានបំផ្លាញ។

ខ្មាន់កាំភ្លើងក្រុមហាម៉ាស់ បានបើកការវាយប្រហារយ៉ាងភ្ញាក់ផ្អើលលើអ៊ីស្រាអែលពីតំបន់ហ្គាហ្សាទៅ កាលពីថ្ងៃទី៧ខែតុលា ដោយបានសម្លាប់មនុស្សជាង១៤០០នាក់ និងចាប់ចំណាប់ខ្មាំងចំនួន២៣០នាក់។

ចាប់តាំងពីពេលនោះមក អ៊ីស្រាអែលបាននិងកំពុងធ្វើការវាយប្រហារឥតស្រាកស្រាន្ត ហើយឥឡូវ ថែមទាំងបើកប្រតិបត្តិការជើងគោកទៀត នៅតំបន់ហ្គាហ្សា៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ UN បោះឆ្នោតគាំទ្រយ៉ាងលើសលប់ ឲ្យមានបទឈប់បាញ់មនុស្សធម៌នៅ ហ្គាហ្សា