ផ្ទុះការវាយប្រហារនៅមូលដ្ឋានទ័ពអាកាសប៉ាគីស្ថាន ស្លាប់មនុស្ស ៩នាក់

ក្រុមសកម្មប្រយុទ្ធអ៊ីស្លាមនិយម ៩ នាក់បានវាយប្រហារមូលដ្ឋានហ្វឹកហ្វឺនកងទ័ពអាកាសនៅតំបន់ Mianwali ភាគកណ្តាលប្រទេសប៉ាគីស្ថាន កាលពីព្រឹកថ្ងៃសៅរ៍បានបណ្ដាលឱ្យខូចខាតដល់យន្តហោះមិនដំណើរការចំនួន ៣គ្រឿង និងរថយន្តដឹកប្រេង ១គ្រឿង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោធាប៉ាគីស្ថាន និយាយនៅក្នុងសេចក្តីថ្លែងការណ៍មួយថា ពួកសកម្មប្រយុទ្ធ ៣នាក់ត្រូវបានសម្លាប់ មុនពេលពួកគេចូលទៅក្នុងមូលដ្ឋាន ចំណែក ៦នាក់ទៀត ត្រូវបានសម្លាប់នៅពេលចូលដល់ក្នុងមូលដ្ឋានទ័ពអាកាស ខណៈយោធាប៉ាគីស្ថានពុំមានរងរបួសនោះទេ។

តាមសម្ដីរបស់អ្នកស្រុក ការប្រយុទ្ធរវាងយោធានិងក្រុមសកម្មប្រយុទ្ធចាប់ផ្ដើមប្រហែលម៉ោង ៣ ទៀបភ្លឺ និងស្ងប់ស្ងាត់ទៅវិញប្រហែលម៉ោង ៧ ព្រឹក។ ក្នុងការប្រយុទ្ធនេះ ក្រៅពីអាវុធធន់តូច គេបានដឹងថាមានការប្រើប្រាស់កាំភ្លើងធំផងដែរ។ យ៉ាងណាមិញ វាមិនបណ្ដាលឱ្យខូចខាតទ្រព្យសម្បត្តិសាធារណៈ ឬពលរដ្ឋណាមួយឡើយ។

សេចក្តីថ្លែងការណ៍របស់យោធាប៉ាគីស្ថានបានបញ្ជាក់ថា ដោយសារតែការឆ្លើយតបយ៉ាងរហ័ស និងមានប្រសិទ្ធភាពដោយកងទ័ពរបស់ខ្លួន ការវាយប្រហារពីក្រុមសកម្មប្រយុទ្ធត្រូវបានរារាំងដោយធានាសុវត្ថិភាព ខណៈសកម្មប្រយុទ្ធទាំង ៩ នាក់ ត្រូវបានសម្លាប់ទាំងអស់៕

ប្រែសម្រួល៖ សន្យា

ប្រភព៖ Reuters

ចុចអាន៖ អ៊ីស្រាអែលប្រកាសថា ប្រទេសណាមិនគាំទ្រខ្លួន ប្រទេសនោះគឺនៅខាងក្រុមហាម៉ាស