ប្រទេសកៀហ្ស៊ីស៊ីស្ថាន កែប្រែទង់ជាតិ ក្រោយរងមតិរិះគន់ពីពលរដ្ឋ

សភានៃប្រទេសកៀហ្ស៊ីស៊ីស្ថានបានបោះឆ្នោតកាលពីថ្ងៃពុធ ទី២៩ ខែវិច្ឆិកា ដោយធ្វើការកែប្រែការរចនាទង់ជាតិ ក្រោយទទួលមតិរិះគន់ពីប្រជាជន រួមទាំងប្រធានាធិបតីរបស់ប្រទេសគឺលោក Sadyr Japarov ។

ប្រធានាធិបតីប្រទេសកៀហ្ស៊ីស៊ីស្ថាន លោក Sadyr Japarov និយាយថា ធាតុកណ្តាលនៃទង់ជាតិមើលទៅមិនដូចព្រះអាទិត្យ តែបែរជាដូចផ្កាឈូករ័ត្នច្រើនជាង។ មូលហេតុនៃការរិះគន់ទង់ជាតិប្រដូចទៅនឹងផ្កាឈូករ័ត្ន ព្រោះនៅក្នុងវប្បធម៌កៀហ្ស៊ីស៊ីស្ថាន ផ្កានេះតំណាងឱ្យភាពដែលព្រមលះបង់ឧត្តគតិដើម្បីផលប្រយោជន៍ផ្ទាល់ខ្លួន។ ដោយសារមានការយល់ឃើញបែបនេះ ទើបប្រជាជនកៀហ្ស៊ីស៊ីស្ថានចាត់ទុកវាជារឿងឈឺចាប់សម្រាប់ជាតិ។  

ទង់ជាតិនៃប្រទេសអាស៊ីកណ្តាលមួយនេះត្រូវបានអនុម័តកាលពីឆ្នាំ ១៩៩២ បន្ទាប់ពីប្រទេសបានទទួលឯករាជ្យពីសហភាពសូវៀត។ ទង់ជាតិមានផ្ទៃពណ៌ក្រហម រូបព្រះអាទិត្យពណ៌លឿងនៅចំកណ្ដាល និងកាំរស្មីរបស់ព្រះអាទិត្យរាងអង្កាញ់ចំនួន ៤០នៅព័ទ្ធជុំវិញ។

យ៉ាងណាមិញ ច្បាប់ដែលត្រូវបានអនុម័តដោយសភារបស់ប្រទេសកៀហ្ស៊ីស៊ីស្ថានកាលពីថ្ងៃពុធបានផ្លាស់ប្តូរការរចនាកាំរស្មីព្រះអាទិត្យដែលមានរាងអង្កាញ់តិចៗ ឱ្យទៅជារស្មីព្រះអាទិត្យត្រង់វិញ ដើម្បីចៀសវាងការយល់ច្រឡំជាមួយផ្កាឈូករ័ត្ន៕

ប្រែសម្រួល៖ សន្យា

ប្រភព៖ Reuters

ចុចអាន៖​ តៃវ៉ាន់ ជំរុញឲ្យកុមារនិង​មនុស្សចាស់ កុំធ្វើដំណើរទៅចិន ព្រោះជំងឺ​ផ្លូវ​ដង្ហើម​