តៃវ៉ាន់ ជំរុញឲ្យកុមារនិង​មនុស្សចាស់ កុំធ្វើដំណើរទៅចិន ព្រោះជំងឺ​ផ្លូវ​ដង្ហើម​

ក្រសួង​សុខាភិបាល​តៃវ៉ាន់ ​នៅ​ថ្ងៃ​ព្រហស្បតិ៍​ទី៣០ខែវិច្ឆិកា ​បាន​ជំរុញ​មនុស្ស​ចាស់ កុមារនិង​មនុស្ស​ដែល​មានប្រព័ន្ធភាពស៊ាំខ្សោយ ត្រូវ​ចៀស​វាង​ការ​ធ្វើ​ដំណើរ​ទៅ​ប្រទេស​ចិន ដោយសារ​តែការ​កើន​ឡើង​នៃករណី​ជំងឺ​ផ្លូវ​ដង្ហើម​នៅ​ទីនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អង្គការសុខភាពពិភពលោក (WHO) កាលពីសប្តាហ៍មុន បានស្នើឲ្យប្រទេសចិន ផ្តល់ព័ត៌មានលម្អិតអំពីការរីករាលដាល ដែលមន្ត្រី WHO និយាយថា វាមិនខ្ពស់ដូចមុនការរាតត្បាតនៃជំងឺកូវីដ-១៩ទេ។

តៃវ៉ាន់ បានបង្កើនការប្រុងប្រយ័ត្នខ្ពស់ ចំពោះការកើតជំងឺនៅក្នុងប្រទេសជិតខាងដ៏ធំរបស់ខ្លួន ចាប់តាំងពីការផ្ទុះឡើងនៃរោគសញ្ញាផ្លូវដង្ហើមធ្ងន់ធ្ងរ (SARS) ដែលបានចាប់ផ្តើមនៅក្នុងប្រទេសចិន ហើយសម្លាប់មនុស្សជិត៨០០នាក់ នៅទូទាំងពិភពលោកក្នុងឆ្នាំ២០០២-២០០៣។

នៅក្នុងសេចក្តីថ្លែងការណ៍មួយ ដែលបញ្ចេញបន្ទាប់ពីកិច្ចប្រជុំគណៈរដ្ឋមន្ត្រីប្រចាំសប្តាហ៍ ក្រសួងសុខាភិបាលតៃវ៉ាននិយាយថា ដោយសារតែការកើនឡើងនៃជំងឺផ្លូវដង្ហើមក្នុងប្រទេសចិន មនុស្សចាស់ កុមារតូចៗ និងអ្នកផ្សេងទៀតដែលមានប្រព័ន្ធភាពស៊ាំខ្សោយ ត្រូវបានស្នើសុំមិនឲ្យធ្វើដំណើរទៅកាន់ប្រទេសចិន ប្រសិនបើចាំបាច់។ ប្រសិនបើការធ្វើដំណើរចាំបាច់ ប្រជាជនគួរតែចាក់វ៉ាក់សាំងការពារជំងឺផ្តាសាយ និងកូវីដ១៩ មុនពេលទៅប្រទេសចិន។

ទោះបីជាយ៉ាងណាក៏ដោយ រដ្ឋមន្ត្រីការបរទេសចិន លោក Wang Yi បាននិយាយកាលពីថ្ងៃពុធថា ការកើនឡើងនៃជំងឺផ្លូវដង្ហើមនៅចិន គឺជាបញ្ហាទូទៅដែលប្រទេសទាំងអស់ប្រឈមមុខ ហើយអាជ្ញាធរចិនបានគ្រប់គ្រងប្រកបដោយប្រសិទ្ធភាពទាំងស្រុងហើយ៕

ប្រែសម្រួល៖ Vann Vann

ប្រភព៖ CNA

ចុចអាន៖ ចិន បញ្ជាក់ថា ការកើនឡើងនៃករណីជំងឺផ្លូវដង្ហើម ត្រូវបានគ្រប់គ្រងទាំងស្រុងហើយ