តៃវ៉ាន់ ប្រទះឃើញបាឡុង ចិន ៤ គ្រឿងហោះលើដែនដីរបស់ខ្លួន ខណៈ​ការ​បោះឆ្នោតសកលជិតឈានមកដល់

ក្រសួងការពារជាតិតៃវ៉ាន់បាននិយាយនៅថ្ងៃពុធនេះថា បាឡុងរបស់ប្រទេសចិនចំនួន ៤ គ្រឿងត្រូវបានប្រទះឃើញហោះឆ្លងកាត់ខ្សែបន្ទាត់កណ្ដាលនៃច្រកសមុទ្រតៃវ៉ាន់ ខណៈក្នុងនោះមាន ៣ គ្រឿងហោះពីលើដែនដីនៃកោះនេះតែម្ដង ។

យោងតាមការចុះផ្សាយរបស់សារព័ត៌មាន Bloomberg បានឲ្យដឹងថា ក្រសួងការពារជាតិតៃវ៉ាន់បានបង្ហាញពីរូបភាពរបស់បាឡុងចិនចំនួន ៣ គ្រឿងហោះឆ្ពោះទៅទិសដៅភាគឦសាននៅពីលើកោះតៃវ៉ាន់ ក្រោយពេលដែលគេឃើញហោះជិតមូលដ្ឋានទ័ពអាកាស Ching-Chuan-Kang ក្នុងទីក្រុង Taichung ភាគខាងលិចនៃកោះនេះ ។

ក្រសួងបានបញ្ជាក់ទៀតថា បាឡុងមួយក្នុងចំណោមបាឡុងទាំង ៤ នោះបានហោះក្នុងរយៈកម្ពស់ ៣,៦៥៨ ម៉ែត្រ ខណៈហេតុការណ៍នេះកើតមានឡើងប្រមាណ ១០ ថ្ងៃទៀតប៉ុណ្ណោះ មុនពេលកោះតៃវ៉ាន់នឹងរៀបចំការបោះឆ្នោតសកលដើម្បីជ្រើសរើសមេដឹកនាំថ្មី ហើយក៏ជាថ្ងៃទីពីរ ២ ជាប់ៗគ្នាផងដែរ ដែលមានវត្តមានបាឡុងបែបនេះត្រូវបានប្រទះឃើញនៅពីលើកោះតៃវ៉ាន់ ។

ពាក់ព័ន្ធនឹងបញ្ហានេះទៀតសោត ក្រសួងការពារជាតិតៃវ៉ាន់ក៏នឹងបន្តត្រួតពិនិត្យ ក៏ដូចជាតាមដានយ៉ាងដិតដល់ថាតើនឹងមានបាឡុងចិនផ្សេងទៀតទេ ហោះចូលមកលើទឹកដីនៃកោះតៃវ៉ាន់ ខណៈក្រសួងក៏បានប្ដេជ្ញានឹងចាត់វិធានការឆ្លើយតបនៅក្នុងលក្ខខណ្ឌសមស្របណាមួយផងដែរ ។

គួរបញ្ជាក់ តៃវ៉ាន់នឹងរៀបចំការបោះឆ្នោតជ្រើសរើសមេដឹកនាំថ្មីនៅថ្ងៃទី១៣ ខែមករា ឆ្នាំ២០២៤ នេះដើម្បីជំនួសតំណែងលោកស្រីប្រធានាធិបតី Tsai Ing-wen ដែលត្រូវផុតអាណត្តិ ខណៈមានបេក្ខភាពឈរឈ្មោះចំនួន ៣ រូបរួមមានលោក William Lai មកពីគណបក្សវឌ្ឍនភាពប្រជាធិបតេយ្យ (DPP) ដែលកំពុងកាន់អំណាច, លោក Hou Yu-ih មកពីគណបក្ស Kuomintang (KMT) និងលោក Ko Wen-je មកពីគណបក្សប្រជាជនតៃវ៉ាន់ (TPP) ៕

ប្រែសម្រួលដោយ ៖ ជីវ័ន្ត

ចុចអាន ៖ ចិន ដកតំណែងមន្ត្រីយោធាជាន់ខ្ពស់ ៩ រូប