ព័ត៌មានអន្ដរជាតិ

តៃវ៉ាន់ វាយបកទៅ ចិន វិញ ក្រោយពាក្យស៊កសៀតរឿងជ្រើសរើសបានមេដឹកនាំថ្មី

បានផុស

២ years មុន

នៅ

ថ្ងៃអង្គារ ១៦ មករា ២០២៤

ដោយ

តៃវ៉ាន់បានចេញមកវាយបកទៅកាន់ប្រទេសចិនវិញ ក្រោយអ្នកនាំពាក្យការិយាល័យចិនទទួលបន្ទុកកិច្ចការតៃវ៉ាន់ផ្លែផ្កា និងឌឺដងពាក្យសម្ដី ក៏ដូចជាបញ្ជាក់ពីគោលជំហររបស់រដ្ឋាភិបាលទីក្រុងប៉េកាំងទៅកាន់ដែនកោះមួយនេះ បន្ទាប់ពីលោក Lai Ching-te ជាប់ឆ្នោតជាប្រធានាធិបតីថ្មី ។ នេះបើយោងតាមការចុះផ្សាយដោយសារព័ត៌មាន Al Jazeera នៅថ្ងៃទី១៦ ខែមករានេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការបរទេសតៃវ៉ាន់បានបញ្ជាក់នៅក្នុងសេចក្ដីថ្លែងការណ៍មួយថា “តៃវ៉ាន់សូមអំពាវនាវដល់សាធារណរដ្ឋប្រជាមានិតចិនឲ្យគោរពលទ្ធផលបោះឆ្នោត និងត្រូវហ៊ានទទួលស្គាល់ការពិត ហើយបោះបង់ចោលចិត្តគំនិតសម្លុតគំរាមដែនកោះមួយនេះទៀតទៅ ជាពិសេសរដ្ឋាភិបាលទីក្រុងប៉េកាំងគ្មានសិទ្ធិហាមាត់ស្ដីប៉ះពាល់ដល់ប្រជាជនតៃវ៉ាន់ ឬតំណាងកោះនេះនៅលើឆាកអន្តរជាតិឡើយ” ។

ក្រសួងការបរទេសបានលើកឡើងទៀតថា “ពាក្យសម្ដីដែលចិននិយាយថា លទ្ធផលឈ្នះឆ្នោតរបស់គណបក្សវឌ្ឍនភាពប្រជាធិបតេយ្យ (DPP) មិនអាចតំណាងឲ្យសាធារណមតិរបស់តៃវ៉ាន់ទាំងមូលនោះ គឺផ្ទុយនឹងសេចក្ដីទុកចិត្តរបស់សហគមន៍ប្រជាធិបតេយ្យសកល ជាពិសេសគឺប្រឆាំងនឹងឆន្ទៈរបស់ម្ចាស់ឆ្នោតតៃវ៉ាន់ក្នុងការលើកតម្កើងតម្លៃប្រជាធិបតេយ្យ ហើយពាក្យស៊កសៀតបែបនេះ មិនគួរនឹងនិយាយចេញមកឡើយ” ។

ដោយឡែកពាក់ព័ន្ធនឹងរឿងរ៉ាវដែលទីភ្នាក់ងារព័ត៌មានចិន Xinhua ចុះផ្សាយថា ការបង្រួបបង្រួមជាតិជាមួយតៃវ៉ាន់ គឺជារឿងចៀសមិនរួចនោះ, អនាគតប្រធានាធិបតីលោក Lai Ching-te ក៏បានធ្វើការឆ្លើយតបផងដែរថា លោកនៅតែប្រកាន់ជំហរ “ចិន និងតៃវ៉ាន់បែងចែកដាច់ពីគ្នា” ហើយលោកនឹងបន្តគោលនយោបាយរបស់លោកស្រីប្រធានាធិបតីដែលផុតអាណត្ត Tsai Ing-wen ដដែល គឺជំរុញកិច្ចសហប្រតិបត្តិការជាមួយអាមេរិកដើម្បីទប់ទល់មិនឲ្យចិនច្បាមយកដែនកោះមួយនេះទៅវិញឡើយ ។

គួរបញ្ជាក់ថា ការបោះពាក្យសម្ដីឌឺដងផ្លែផ្ការវាងចិន និងតៃវ៉ាន់កើតមានឡើង បន្ទាប់ពីលោក Lai Ching-te ដែលរដ្ឋាភិបាលទីក្រុងប៉េកាំងចាត់ទុកជាអ្នកបំផ្លាញសន្តិភាព និងជាមនុស្សគ្រោះថ្នាក់ ត្រូវបានពលរដ្ឋផ្ដល់សេចក្ដីទុកចិត្តបោះឆ្នោតឲ្យឈ្នះតំណែងជាប្រធានាធិបតីក្នុងសំឡេងគាំទ្រជិត ៥.៦ លានសំឡេង ឬ ៤០ ភាគរយនៃសំឡេងឆ្នោតបានការ នៅក្នុងការបោះឆ្នោតសកលកាលពីថ្ងៃទី១៣ ខែមករាកន្លងទៅនេះ ៕