រុស្ស៊ី បញ្ជាក់ជំហរទៅ ចិន យ៉ាងណាដែរ ក្រោយ តៃវ៉ាន់ ជ្រើសរើសបានមេ​ដឹកនាំថ្មី

ប្រទេសរុស្ស៊ីបានចេញមកបញ្ជាក់ពីជំហររបស់ខ្លួនទៅកាន់ប្រទេសចិន បន្ទាប់ពីលោក Lai Ching-te មកពីគណបក្សវឌ្ឍនភាពប្រជាធិបតេយ្យ (DPP) ត្រូវបានពលរដ្ឋតៃវ៉ាន់ផ្ដល់សេចក្ដីទុកចិត្តបោះឆ្នោតឲ្យឈ្នះតំណែងជាប្រធានាធិបតីថ្មីរបស់ដែនកោះមួយនេះ ។ នេះបើយោងតាមការចុះផ្សាយរបស់សារព័តមានរុស្ស៊ី TASS នៅថ្ងៃអាទិត្យ ទី១៤ ខែមករានេះ ។

អ្នកនាំពាក្យក្រសួងការបរទេសរុស្ស៊ីលោកស្រី Maria Zakharova បានបញ្ជាក់ថា តៃវ៉ាន់គឺជាផ្នែកដ៏សំខាន់មិនអាចកាត់ថ្លៃបានរបស់ប្រទេសចិន ហើយរដ្ឋាភិបាលទីក្រុងមូស្គូប្រឆាំងដាច់ខាតនូវគ្រប់ទម្រង់នៃចលនាបំបែកខ្លួន ក៏ដូចជាឯករាជ្យភាពរបស់ដែនកោះមួយនេះ ។

លោកស្រីបានបន្ថែមថា “ការចិញ្ចឹមចិត្តរបស់បណ្តាប្រទេសមួយចំនួនក្នុងការប្រើប្រាស់ការបោះឆ្នោតនៅតៃវ៉ាន់កាលពីថ្ងៃទី១៣ ខែមករាកន្លងទៅដើម្បីដាក់សម្ពាធលើរដ្ឋាភិបាលទីក្រុងប៉េកាំង និងធ្វើឲ្យស្ថានការណ៍នៅច្រកសមុទ្រតៃវ៉ាន់ ក៏ដូចជានៅទូទាំងតំបន់មានអស្ថិរភាពគឺជា ការបង្អាក់ឲ្យខូចប្រយោជន៍រួម ហើយត្រូវតែថ្កោលទោសពីសំណាក់សហគមន៍អន្តរជាតិ ដោយសារតែទំនាក់ទំនងរវាងភាគីនៃច្រកសមុទ្រមួយនេះ គឺជាកិច្ចការផ្ទៃក្នុងដែលក្ដោបក្ដាប់ដោយចិន” ។

លោកស្រី Zakharova បញ្ជាក់ទៀតថា ជំហររបស់រុស្ស៊ីចំពោះតៃវ៉ាន់ គឺមិនប្រែប្រួលនោះឡើយ ។ រុស្ស៊ីគោរពគោលការណ៍ “ចិនតែមួយ” ដែលទទួលស្គាល់ជាសកលលោក ហើយរដ្ឋាភិបាលនៃសាធារណរដ្ឋប្រជាមានិតចិន គឺជារដ្ឋាភិបាលស្របច្បាប់តែមួយគត់តំណាងឲ្យប្រទេសចិនទាំងមូល ហើយតៃវ៉ាន់គឺជាផ្នែកសំខាន់មួយរបស់ប្រទេសចិន ខណៈភាគីរុស្ស៊ីក៏ប្រឆាំងទៅនឹងឯករាជ្យភាពរបស់តៃវ៉ាន់ក្នុងគ្រប់រូបភាពទាំងអស់ផងដែរ” ។

ពាក់ព័ន្ធនឹងបញ្ហានេះដែរ ទីភ្នាក់ងារព័ត៌មានចិន Xinhua បានរាយការណ៍ថា ការបង្រួបបង្រួមជាតិជាមួយតៃវ៉ាន់នៅតែជារឿងចៀសមិនរួច ហើយចិនសូមប្រឆាំង​យ៉ាងដាច់ខាត​ចំពោះ​សកម្មភាព​ “ឯករាជ្យ​ភាព​តៃវ៉ាន់” ព្រម​ទាំង​ការលូកលាន់​ពី​បរទេស ជាពិសេសលទ្ធផលឈ្នះឆ្នោតរបស់បក្ស DPP ក៏មិនអាចតំណាងឲ្យសាធារណមតិរបស់ដែនកោះមួយនេះនោះដែរ” ។

គួរបញ្ជាក់ថា ពលរដ្ឋតៃវ៉ាន់បានផ្ដល់សេចក្ដីទុកចិត្តបោះឆ្នោតឲ្យលោក Lai Ching-te មកពីគណបក្សវឌ្ឍនភាពប្រជាធិបតេយ្យ (DPP) ដែលជាបក្សកំពុងកាន់អំណាច បន្តឈ្នះតំណែងប្រធានាធិបតីដោយទទួលបានសំឡេងជិត ៥.៦ លានសំឡេង ឬ ៤០ ភាគរយនៃសំឡេងឆ្នោតបានការ ៕

ដោយ ៖ សុខ ជីវ័ន្ត

ចុចអាន ៖ អាមេរិក និង ចិន ប្រតិកម្មយ៉ាងណាខ្លះ បន្ទាប់ពី តៃវ៉ាន់ ជ្រើសរើសបានប្រធានាធិបតីថ្មី