WHO យល់ព្រមឲ្យប្រើប្រាស់ជាបន្ទាន់នូវវ៉ាក់សាំងកូវីដមានតម្លៃថោកមួយទៀត

ទីភ្នាក់ងារសុខាភិបាលរបស់អង្គការសហប្រជាជាតិ បានចុះបញ្ជីវ៉ាក់សាំងការពារជំងឺកូវីដ១៩ ដែលបង្កើតដោយសកលវិទ្យាល័យ Oxford និងក្រុមហ៊ុនផលិតឱសថ AstraZeneca សម្រាប់ការប្រើប្រាស់ជាបន្ទាន់ប៉ុន្មាន ពោលគឺប៉ុន្មានថ្ងៃបន្ទាប់ពីក្រុមអ្នកជំនាញបានណែនាំឲ្យប្រើផលិតផលនេះក្នុងស្ថានភាពដែលវីរុសបំប្លែងខ្លួនកំពុងសាយភាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីថ្លែងការណ៍របស់អង្គការសុខភាពពិភពលោក (WHO) កាលពីថ្ងៃចន្ទបាននិយាយថា ខ្លួនយល់ព្រមចំពោះការចាក់វ៉ាក់សាំងតម្លៃថោកដែលផលិតដោយក្រុមហ៊ុន AstraZeneca-SKBio (កូរ៉េខាងត្បូង) និងវិទ្យាស្ថាន Serum ឥណ្ឌា។

លោក Tedros Adhanom Ghebreyesus អគ្គនាយក WHO បានប្រាប់សន្និសីទសារព័ត៌មានមួយថា “ឥឡូវ យើងមានចំណែកទាំងអស់សម្រាប់ចែកចាយវ៉ាក់សាំង។ ប៉ុន្តែយើងនៅតែត្រូវការពង្រីកផលិតកម្ម”។

លោកនិយាយថា “យើងបន្តអំពាវនាវដល់អ្នកអភិវឌ្ឍវ៉ាក់សាំងកូវីដ ត្រូវបញ្ជូនសំណុំឯកសាររបស់ពួកគេទៅកាន់ WHO ដើម្បីពិនិត្យនៅពេលតែមួយដូចដែលពួកគេបញ្ជូនទៅឲ្យនិយ័តករនៅក្នុងប្រទេសដែលមានប្រាក់ចំណូលខ្ពស់”។

ការពិនិត្យរបស់ WHO បានរកឃើញថា វ៉ាក់សាំង AstraZeneca បានបំពេញតាមលក្ខណៈវិនិច្ឆ័យសម្រាប់សុវត្ថិភាព ហើយអត្ថប្រយោជន៍ប្រសិទ្ធភាពរបស់វាមានលើសពីហានិភ័យ។

វ៉ាក់សាំង Oxford-AstraZeneca ត្រូវបានគេសរសើរដោយសារតែវាមានតម្លៃថោកជាង ហើយអាចទុកនៅសីតុណ្ហភាពទូរទឹកកកធម្មតាបាន។ នេះធ្វើឲ្យមានភាពងាយស្រួលក្នុងការចែកចាយជាងគូប្រជែងមួយចំនួនរួមទាំងវ៉ាក់សាំងដែលត្រូវបានអភិវឌ្ឍដោយក្រុមហ៊ុន Pfizer និង BioNTech ដែលត្រូវបានចុះបញ្ជីសម្រាប់ការប្រើប្រាស់បន្ទាន់ដោយ WHO កាលពីចុងខែធ្នូផងដែរ៕

ប្រែសម្រួលដោយ៖ Vann Vann

ប្រភព៖ Al Jazeera