អ៊ីស្រាអែល វាយប្រហារតាមអាកាសលើ លីបង់ សម្លាប់ជនស៊ីវិលច្រើននាក់

ការវាយឆ្មក់តាមអាកាសរបស់អ៊ីស្រាអែលនៅភាគខាងត្បូងប្រទេសលីបង់បានសម្លាប់ជនស៊ីវិលយ៉ាងហោចណាស់ ១០ នាក់ រួមទាំងកុមារ និងសមាជិកក្រុមប្រដាប់អាវុធហេសបូឡាចំនួន ៣ នាក់ ហើយនេះក៏ជាការវាយប្រហារដ៏សាហាវបំផុតផងដែរក្នុងរយៈពេល ៤ ខែ បន្ទាប់ពីការបាញ់បោះដាក់គ្នាឆ្លងព្រំដែន ។ នេះបើយោងតាមការចេញផ្សាយរបស់សារពត៌មាន Al Jazeera កាលពីថ្ងៃទី១៥ ខែកុម្ភៈកន្លងទៅ ។

ស្របពេលជាមួយគ្នានេះ ការវាយប្រហារនៅទីក្រុង Nabatieh កាលពីពេលថ្មីៗនេះបានបំផ្លាញអគារមួយចំនួន និងសម្លាប់សមាជិកគ្រួសារ ៧ នាក់ រួមទាំងកុមារផងដែរ ដោយបានបង្កើនក្ដីភ័យខ្លាចនៃជម្លោះថ្មីមួយទៀតរវាងអ៊ីស្រាអែល និងក្រុមហេសបូឡា ។

ការវាយប្រហារនេះបានធ្វើឲ្យក្រុមប្រដាប់អាវុធហេសបូឡាដែលជាចលនាប្រដាប់អាវុធដ៏មានឥទ្ធិពលរបស់លីបង់ប្រកាសបើកការសងសឹកជាមួយអ៊ីស្រាអែលវិញ ខណៈលោក Hassan Fadlallah មន្ត្រីជាន់ខ្ពស់របស់ហេសបូឡាបាននិយាយថា អ៊ីស្រាអែលត្រូវតែតបស្នងចំពោះឧក្រិដ្ឋកម្មទាំងនេះ ។

គួរបញ្ជាក់ថា ការវាយប្រហារនេះបានកើតឡើង បន្ទាប់ពីការបាញ់គ្រាប់រ៉ុកកែតចេញពីភាគខាងត្បូងប្រទេសលីបង់វាយប្រហារមូលដ្ឋានយោធាមួយនៅទីក្រុង Safed នៅភាគខាងជើងប្រទេសអ៊ីស្រាអែល បានសម្លាប់ទាហានអ៊ីស្រាអែលម្នាក់ ដែលធ្វើឲ្យមានការភ័យខ្លាចកាន់តែខ្លាំងឡើងនៃជម្លោះមួយផ្សេងទៀតរវាងអ៊ីស្រាអែល និងក្រុមហេសបូឡា ។

ក្នុងការវាយប្រហារនោះទៀតសោត ក៏បណ្ដាលឲ្យមនុស្សរាប់ម៉ឺននាក់បានភៀសខ្លួនរួចទៅហើយនៅតាមព្រំដែនប្រទេសទាំងពីរ ស្របពេលដែលភ្លើងសង្គ្រាមក្នុងតំបន់ហ្គាហ្សាក៏កាន់តែឆេះរោលរាល ខណៈការវាយប្រហារឆ្លងព្រំដែននាពេលកន្លងមកបានសម្លាប់មនុស្សនៅក្នុងប្រទេសលីបង់យ៉ាងតិច ២០០ នាក់ ក្នុងនោះមានយុទ្ធជនហេសបូឡាជាង ១៧០ នាក់ ចំណែកខាងអ៊ីស្រាអែលមានទាហាន ១០ នាក់ និងជនស៊ីវិល ៥ នាក់បានស្លាប់បាត់បង់ជីវិត ៕

អត្ថបទ ៖ ប៊ុន សុភាព