ប៉ូលិសថៃ មួយចំនួនធ្លាក់ខ្លួនជំពាក់បំណុលគេវ័ណ្ឌ.ក សឹងគ្មានផ្ទះនៅ

ឆ្លើយ​តប​ទៅ​សំណួរ​របស់​គណៈកម្មាធិការ​សភា​ដែល​ពិនិត្យ​មើល​សេចក្តី​ព្រាង​ច្បាប់​ចំណាយ​ថវិកា​ប្រចាំ​ឆ្នាំ២០២៤, អគ្គស្នងការនគរបាលជាតិថៃ លោកឧត្តមសេនីយ៍ Torsak Sukvimol និយាយចំៗថា ប៉ូលិសបានធ្លាក់ខ្លួនជំពាក់បំណុលវ័ណ្ឌ.កប្រមាណ ៣០០ ពាន់លានបាត ហើយមួយចំនួនរកតែមួយបាតដាក់ខ្លួនគ្មាន និងសឹងមិនមានផ្ទះនៅទៀតផង ។ នេះបើយោងតាមការចុះផ្សាយរបស់​ Bangkok Post នៅថ្ងៃព្រហស្បតិ៍ទី២២ខែកុម្ភៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបញ្ជាក់ច្បាស់ៗបែបនេះ ខណៈពេលត្រូវបានកោះហៅឲ្យឆ្លើយសំណួរ ជុំវិញថវិកាដែល បែងចែកទៅឲ្យនគរបាលជាតិថៃ (RTP) មានតម្លៃ១១៧ពាន់លានបាត។

លោក Torsak និយាយថា “ទាក់ទងនឹងលំនៅដ្ឋានសុខុមាលភាព ខ្ញុំសូមស្នើសុំថវិកាសាងសង់ផ្ទះល្វែងសម្រាប់មន្រ្តី។ ប្រសិនបើជីវភាពរបស់ពួកគេកាន់តែប្រសើរឡើងនោះ ពួកគេច្បាស់ជាកាន់តែមានទឹកចិត្តក្នុងការបម្រើ និងការពារប្រជាពលរដ្ឋ”។

លោកសង្កត់ធ្ងន់ថា “មន្ត្រីជាន់ខ្ពស់តែងតែជំរុញឲ្យនគរបាលថ្នាក់ក្រោម មានស្មារតីខ្ពស់ក្នុងការងាររក្សាសន្តិភាពនិងសណ្តាប់ធ្នាប់។ យ៉ាងណាក្តី ជីវភាពរបស់មន្ត្រី ក៏ត្រូវបំពេញតាមស្តង់ដារមួយចំនួនផងដែរ។ រាល់គម្រោងដែលអនុវត្តដោយ RTP គឺទទួលខុសត្រូវ និងមានតម្លាភាព។ ប្រសិនបើមានអ្វីសង្ស័យ ខ្ញុំមិនចុះហត្ថលេខាទេ”។

ស្របពេលជាមួយគ្នានោះ លោក​ក៏​បាន​ចង្អុល​បង្ហាញ​ពី​កង្វះ​កម្លាំង​ពលកម្ម​ដោយសារ​ការ​រាតត្បាត​នៃ​ជំងឺ​កូវីដ-១៩ ក្នុង​រយៈពេល​បី​ឆ្នាំ​កន្លង​មក​នេះផងដែរ។ ជាឧទាហរណ៍ ប៉ុស្តិ៍ប៉ូលិស ជិតទីក្រុងបាងកក មានតំណែងសម្រាប់មន្ត្រីរហូតដល់២០០នាក់ ឲ្យមកចូលកាន់ ប៉ុន្តែជាក់ស្តែង មានអ្នកចូលកាន់តែពាក់កណ្តាលប៉ុណ្ណោះទាំងដែលពួកគេ ត្រូវបម្រើប្រជាពលរដ្ឋប្រហែល៤០ម៉ឺននាក់នៅក្នុងសហគមន៍ ស្ថិតក្រោមយុត្តាធិការរបស់ខ្លួន។

សូមបញ្ជាក់ថា នគរបាលជាតិថៃត្រូវបានបង្កើតឡើងក្នុងឆ្នាំ១៨៦០ ហើយបច្ចុប្បន្ន មានកម្លាំងប្រមាណ២៣០០០០នាក់៕

អត្ថបទ៖ សុខ សុវណ្ណ

ចុចអាន៖ ប៉ូលិសថៃស្លៀកឈុតឆ្អឹងខ្មោចដើម្បីបន្លំខ្លួនចាប់ជនល្មើស