ព័ត៌មានអន្ដរជាតិ

Elon Musk ថា ពេលនេះអ្នកជំងឺដែលដាក់បន្ទះឈីបក្នុងខួរក្បាល អាចបញ្ជា Mouse កុំព្យូទ័រ តាមរយៈការគិត

បានផុស

២ years មុន

នៅ

ថ្ងៃព្រហស្បតិ៍ ២២ កុម្ភៈ ២០២៤

ដោយ

មហាសេដ្ឋីបច្ចេកវិទ្យាអាមេរិកលោក Elon Musk កាលពីពេលថ្មីៗនេះបានអះអាងថា អ្នកជំងឺដែលទទួលការសាកល្បងពិសោធន៍ដោយបញ្ចូលបន្ទះឈីបចូលទៅក្នុងខួរក្បាល ពេលនេះអាចបញ្ជាលើ Mouse កុំព្យូទ័រឲ្យមានចលនាបានដោយគ្រាន់តែប្រើប្រាស់ការគិតប៉ុណ្ណោះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពព័ត៌មានពី NHK មហាសេដ្ឋី Elon Musk បានឲ្យដឹងកាលពីខែមករាកន្លងទៅថា លោកបានចូលរួមទុនក្រុមហ៊ុនថ្មីមួយឈ្មោះ Neuralink ដែលអនុវត្តការបញ្ចូលបន្ទះឈីបទៅក្នុងខួរក្បាលជាលើកដំបូង ហើយកាលពីថ្ងៃចន្ទកន្លងទៅ នៅក្នុងកម្មវិធីបច្ចេកវិទ្យាអនឡាញមួយ លោកបានប្រកាសថា “អ្នកជំងឺដែលបានពិសោធហើយនោះ គឺមានសុខភាពវិលត្រលប់មកភាពប្រក្រតីជាធម្មតា និងពុំមានបញ្ហាអ្វីគួរឲ្យកត់សម្គាល់ឡើយ ហើយថែមទាំងអាចបញ្ជាលើ Mouse ឲ្យមានចលនានៅលើស្រ្កីនកុំព្យូទ័រ ដោយគ្រាន់តែគេគិតតែប៉ុណ្ណោះ” ។ លោក Musk ក៏បានបន្ថែមថា ពេលនេះក្រុមស្រាវជ្រាវរបស់លោកក៏កំពុងព្យាយាមសម្រេចឲ្យបាននូវប៊ូតុងដែលអាចចុចបានតាមរយៈការគិតនោះផងដែរ ។

ដោយឡែក ប្រភពព័ត៌មាននៃសហរដ្ឋអាមេរិកជាច្រើនពុំទាន់មានបង្ហាញនូវវីដេអូ ឬព័ស្តុតាងមួយចំនួនដើម្បីបញ្ជាក់ករណីខាងលើនេះនៅឡើយទេ ហើយករណីសិក្សាពីមជ្ឈដ្ឋានផ្សេងទៀតដូចជាពីមន្ទីរពិសោធន៍សិក្សានៃសាកលវិទ្យាល័យផ្សេងៗ ក៏ពុំទាន់អាចសន្និដ្ឋានរួចរាល់ពីករណីនេះដូចគ្នា ។

ស្របពេលជាមួយគ្នានេះ បណ្តាសាកលវិទ្យាល័យ និងអាជីវកម្មមួយចំនួនកំពុងសិក្សាស្រាវជ្រាវលើករណីបច្ចេកវិទ្យាភ្ជាប់ទៅនឹងខួរក្បាលមនុស្ស ដើម្បីសម្រួលឲ្យអ្នកដែលមានពិការភាពផ្នែករូបរាងកាយ អាចបញ្ជាប្រើប្រាស់កុំព្យូទ័របានតាមរយៈការគិតផងដែរ ។

គួររំឭកដែរថា កាលពីឆ្នាំ ២០២៣ កន្លងទៅ ក្រុមហ៊ុនស្រាវជ្រាវផ្នែកវេជ្ជសាស្រ្តមួយនៅសហរដ្ឋអាមេរិកក៏បានផ្សាយអំពីការសិក្សាពិសោធន៍សាកល្បងមួយផងដែរ ដែលដាក់នូវវត្ថុបច្ចេកទេសអាចអានសារសញ្ញាពីបន្ទះតូចមួយចាក់ក្នុងសរសៃឈាមមនុស្សភ្ជាប់ទំនាក់ទំនងនៅក្នុងខួរក្បាល ហើយរបាយការណ៍ពិសោធក៏បានបង្ហាញលទ្ធផលដែរថា រយៈ ១ ឆ្នាំក្រោយតាមដានពិនិត្យ គឺអ្នកជំងឺពិសោធន៍ពុំមានបញ្ហាសតិអ្វីនោះឡើយ៕