អ៊ូសបេគីស្ថាន ដាក់គុកក្រុមចែកចាយស៊ីរ៉ូប៌ក្អកមានមេរោគ ដែលសម្លាប់កុមារយ៉ាងច្រើន

តាមការចុះផ្សាយរបស់ Reuters កាលពីថ្ងៃចន្ទទី២៦ខែកុម្ភៈ, តុលាការអ៊ូសបេគីស្ថាន បានកាត់ទោសដាក់ពន្ធនាគារមនុស្សចំនួន២៣នាក់ ជុំវិញការស្លាប់កុមារ៦៨នាក់ ជាប់ពាក់ព័ន្ធទៅនឹងថ្នាំស៊ីរ៉ូប៍ក្អកក្លែងក្លាយមានមេរោគ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនជាប់ចោទ ត្រូវបានរកឃើញមានពិរុទ្ធពីបទគេចពន្ធ ចែកចាយឱសថគ្មានស្តង់ដារឬក្លែងក្លាយ រំលោភអំណាច ធ្វេសប្រហែស ក្លែងបន្លំ និងស៊ីសំណូក ហើយអ្នកទាំងនេះ ត្រូវដាក់ទោស​ជាប់ពន្ធនាគារ​ពី​២​​ទៅ​២០​ឆ្នាំ។

តាមពិតទៅ ថ្នាំស៊ីរ៉ូប៏ក្អកដែលមានមេរោគនេះ គឺផលិតដោយក្រុមហ៊ុន Marion Biotech នៅ ប្រទេសឥណ្ឌាឯណោះទេ ប៉ុន្តែវាត្រូវបានចែកចាយដោយក្រុមហ៊ុន Quramax Medical ដែលមានមូលដ្ឋានក្នុងប្រទេសអ៊ូសបេគីស្ថាន។

កាលពីខែមករាកន្លងទៅ អង្គការសុខភាពពិភពលោក (WHO) ប្រកាសថា ស៊ីរ៉ូប៍ក្អកពីរប្រភេទរបស់ក្រុមហ៊ុន Marion Biotech គឺខុសស្តង់ដារ បន្ទាប់ពីមានកុមារអ៊ូសបេគីស្ថាន ចំនួន១៨ នាក់បាត់បង់ជីវិតបន្ទាប់ពីផឹកថ្នាំនេះ។

តាមការរកឃើញរបស់ WHO, ស៊ីរ៉ូប៍ទាំងពីរប្រភេទឈ្មោះ Ambronol និង Dok-1 Max គឺមានផ្ទុកសារធាតុកខ្វក់ក្នុងបរិមាណដែលមិនអាចទទួលយកបានទាល់តែសោះ។

ទោះបីជាយ៉ាងណាក៏ដោយ ពេលនោះ ក្រុមហ៊ុន Marion Biotech បានចេញមុខបដិសេធ ហើយប្រាប់ទៅ BBC ថា ខ្លួនសូមមិនយល់ព្រមជាមួយនឹងការរកឃើញនេះទេ។ 

ក្រោយមក ក្រសួងសុខាភិបាលឥណ្ឌា ក៏បានផ្អាកផលិតកម្ម ហើយអាជ្ញាប័ណ្ណរបស់ក្រុមហ៊ុន ក៏ត្រូវបាននាយកដ្ឋានសុវត្ថិភាពចំណីអាហារនៅរដ្ឋ Uttar Pradesh ផ្អាកផងដែរ។ លុះមកដល់ខែមីនា អាជ្ញាប័ណ្ណផលិតកម្មរបស់ក្រុមហ៊ុនត្រូវបានលុបចោលជាអចិន្ត្រៃ៕

អត្ថបទ៖ សុខ សុវណ្ណ

ចុចអាន៖ WHO រកឃើញថ្នាំទឹកស៊ីរ៉ូប៍ ផ្ទុកសារធាតុមានគ្រោះថ្នាក់ នៅក្នុងតំបន់កាន់តែច្រើន