ឥណ្ឌូណេស៊ី កាត់ទោសដាក់ពន្ធនាគារ នាយកប្រតិបត្តិក្រុមហ៊ុនផលិតថ្នាំស៊ីរ៉ូប៍ក្អក ពាក់ព័ន្ធការស្លាប់កុមារជាង២០០នាក់

តុលាការឥណ្ឌូណេស៊ី បានកាត់ទោសដាក់ពន្ធនាគារ នាយកប្រតិបត្តិម្នាក់និងមន្ត្រីបីនាក់នៃក្រុមហ៊ុន Afi Farma ពីបទបំពានច្បាប់សុវត្ថិភាពឱសថ ក្រោយពេលថ្នាំទឹកស៊ីរ៉ូប៍ក្អករបស់ក្រុមហ៊ុននេះ ជាប់ពាក់ព័ន្ធនឹងការស្លាប់កុមារជាង២០០នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុនខាងលើ ត្រូវបានចោទប្រកាន់ពីបទផលិតស៊ីរ៉ូប៍ក្អក ដែលមានផ្ទុកសារធាតុពុលច្រើនហួសកម្រិត ហើយរដ្ឋអាជ្ញាបានចោទប្រកាន់មន្ត្រីទាំងបួនពីបទ ធ្វេសប្រហែសមិនធ្វើតេស្តសារធាតុផ្សំ។

ទោះបីជាយ៉ាងណាក៏ដោយ មេធាវីរបស់ក្រុមហ៊ុនឈ្មោះ Reza Wendra Prayogo និយាយថា ពួកគេបានបដិសេធការចោទប្រកាន់ ហើយក្រុមហ៊ុនកំពុងពិចារណាថាតើ ត្រូវប្តឹងឧទ្ធរណ៍ឬក៏យ៉ាងណា។

តុលាការនៅទីក្រុង Kediri ក្នុងខេត្ត ជ្វាខាងកើត​ បានកាត់ទោសមន្ត្រីទាំងអស់ ដែលក្នុងនោះមានទាំងនាយកប្រតិបត្តិឈ្មោះ Arief Prasetya Harahap ផងដែរឲ្យជាប់ពន្ធនាគាររយៈពេលពីរឆ្នាំ។

ករណីនេះកើតឡើង ខណៈពិភពលោក កំពុងបង្កើនកិច្ចខិតខំប្រឹងប្រែង ដើម្បីរឹតបន្តឹងការត្រួតពិនិត្យខ្សែសង្វាក់ផ្គត់ផ្គង់ឱសថ បន្ទាប់ពីមានសេចក្តីរាយការណ៍អំពីថ្នាំទឹកស៊ីរ៉ូប៍ក្អក ពុលស្លាប់កុមារជាបន្តបន្ទាប់នៅក្នុងប្រទេសមួយចំនួនដូចជា ហ្គាំប៊ី និងអ៊ូសបេគីស្ថាន ជាដើម៕

ប្រែសម្រួល៖ Vann Vann

ប្រភព៖ Asian One

ចុចអាន៖ ឥណ្ឌា រកឃើញថ្នាំទឹកស៊ីរ៉ូប៍ ២ប្រភេទទៀត មានជាតិពុល បណ្តាលឲ្យកុមារស្លាប់