WHO រកឃើញថ្នាំទឹកស៊ីរ៉ូប៍ ផ្ទុកសារធាតុមានគ្រោះថ្នាក់ នៅក្នុងតំបន់កាន់តែច្រើន

កាលពីចុងសប្តាហ៍ អង្គការសុខភាពពិភពលោក (WHO) និយាយថា ស៊ីរ៉ូប៍និងថ្នាំមានមេរោគជាច្រើនប្រភេទ ត្រូវបានរកឃើញនៅតាមបណ្តាប្រទេសក្នុងតំបន់អាមេរិក មេឌីទែរ៉ាណេខាងកើត អាស៊ីអាគ្នេយ៍ និងប៉ាស៊ីហ្វិកខាងលិច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពី WHO, ផលិតផលដែលរងផលប៉ះពាល់នេះ គឺផលិតដោយក្រុមហ៊ុន Pharmix Laboratories នៅក្នុងប្រទេសប៉ាគីស្ថាន ហើយរកឃើញដំបូងគេនៅក្នុងប្រទេសម៉ាល់ឌីវ និងប៉ាគីស្ថានតែម្តង។ ផលិតផល​ដែល​មានមេរោគខ្លះ ​ក៏​ត្រូវ​បាន​គេ​រក​ឃើញ​នៅ​ប្រទេស​បេលីស ហ្វីជី និង​ឡាវ​ដែរ។

ទោះបីជាយ៉ាងណាក៏ដោយ ក្រុមហ៊ុន Pharmix មិនអាចទាក់ទង សុំការអត្ថាធិប្បាយបានទេ។

WHO និយាយថា ថ្នាំទឹកស៊ីរ៉ូប៍សម្រាប់ព្យាបាលជំងឺច្រើនមុខ គឺមានផ្ទុកសារធាតុ ethylene glycol ក្នុងកម្រិតដែលមិនអាចទទួលយកបាន។

តាមការពិនិត្យជាប្រចាំដោយអាជ្ញាធរចំណីអាហារ និងឱសថម៉ាល់ឌីវ កាលពីខែវិច្ឆិកា, សារធាតុកខ្វក់ ត្រូវបានរកឃើញនៅក្នុងទឹកស៊ីរ៉ូប៍ Alergo ហើយករណីនេះ ក៏ត្រូវបានបញ្ជាក់ដោយនិយតករអូស្ត្រាលីផងដែរ។

WHO បង្ហាញថា ថ្នាំនិងស៊ីរូប៍ដែលផ្ទុកសារធាតុកខ្វក់មានដូចជា Alergo, Emidone, Mucorid, Ulcofin និង Zincell ប៉ុន្តែមកទល់ពេលនេះ មានតែស៊ីរ៉ូប៍ Alergo មួយមុខប៉ុណ្ណោះ ដែលត្រូវបានរកឃើញមានផលប៉ះពាល់នៅក្រៅប្រទេស។

នេះគឺជាការព្រមានថ្មីបំផុតពី WHO អំពីថ្នាំផ្ទុកសារធាតុកខ្វក់ ស្រដៀងទៅនឹងផលិតផល ផលិតនៅក្នុងប្រទេសឥណ្ឌានិងឥណ្ឌូណេស៊ី ដែលបណ្តាលឲ្យកុមារប្រហែល៣០០នាក់ ស្លាប់ទូទាំងពិភពលោកកាលពីឆ្នាំមុន។

យ៉ាងណា សេចក្តីថ្លែងការណ៍របស់ WHO បញ្ជាក់ថា មិនទាន់មានករណីធ្ងន់ធ្ងរណាមួយត្រូវបានរាយការណ៍ទាក់ទងនឹងថ្នាំទឹកស៊ីរ៉ូប៍ផលិតក្នុងប្រទេសប៉ាគីស្ថាននៅឡើយទេ ប៉ុន្តែភ្នាក់ងារនេះ ជំរុញឲ្យប្រទេសនានា បង្កើនការប្រុងប្រយ័ត្នចំពោះផលិតផល ដែលផលិតដោយក្រុមហ៊ុនខាងលើ នៅចន្លោះខែធ្នូឆ្នាំ២០២១ដល់ខែធ្នូឆ្នាំ២០២២៕

ប្រែសម្រួល៖ Vann Vann

ប្រភព៖ Asian One

ចុចអាន៖ ឥណ្ឌូណេស៊ី កាត់ទោសដាក់ពន្ធនាគារ នាយកប្រតិបត្តិក្រុមហ៊ុនផលិតថ្នាំស៊ីរ៉ូប៍ក្អក ពាក់ព័ន្ធការស្លាប់កុមារជាង២០០នាក់