ឥណ្ឌា រកឃើញថ្នាំទឹកស៊ីរ៉ូប៍ ២ប្រភេទទៀត មានជាតិពុល បណ្តាលឲ្យកុមារស្លាប់

និយតករឱសថរបស់ប្រទេសឥណ្ឌាបានរកឃើញថា ស៊ីរ៉ូប៍ក្អក និងស៊ីរ៉ូប៍ប្រឆាំងអាឡ័កស៊ីដែលផលិតដោយក្រុមហ៊ុន Norris Medicines មានជាតិពុល បណ្តាលឲ្យកុមារស្លាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋាភិបាលទីក្រុងដែលី បានចេញរបាយការណ៍នេះ ប៉ុន្មានខែបន្ទាប់ពីស៊ីរ៉ូប៍ក្អកដែលផលិតនៅប្រទេសឥណ្ឌា ត្រូវបានគេផ្សារភ្ជាប់ទៅនឹងការស្លាប់កុមារចំនួន១៤១នាក់ ទូទាំងពិភពលោក។

ស៊ីរ៉ូប៍ទាំងពីរ មួយឈ្មោះ Trimax Expectorant និងមួយទៀតឈ្មោះ Sylpro Plus Syrup គឺមានផ្ទុកសារធាតុ diethylene glycol (DEG) ឬ ethylene glycol (EG) ដូចដែលគេបានរកឃើញនៅក្នុងស៊ីរ៉ូប៍ក្អក ដែលបណ្តាលឲ្យមនុស្សស្លាប់នៅប្រទេសហ្គាំប៊ី អ៊ូសបេគីស្ថាន និងកាមេរូន ចាប់តាំងពីពាក់កណ្តាលឆ្នាំមុនមក។

លោក HG Koshia ស្នងការរដ្ឋបាលគ្រប់គ្រងចំណីអាហារនិងឱសថនៃរដ្ឋ Gujarat បានប្រាប់រ៉យទ័រកាលពីថ្ងៃពុធទី៤ខែតុលាថា ពួកគេបានត្រួតពិនិត្យរោងចក្ររបស់ក្រុមហ៊ុន Norris កាលពីខែមុន ហើយបានបញ្ជាឲ្យផ្អាកការផលិត។

លោកនិយាយថា “ក្រុមហ៊ុនខាងលើមិនបានអនុលោមតាមច្បាប់នៃការអនុវត្តផលិតកម្មល្អនោះទេ។ ដើម្បីផលប្រយោជន៍សាធារណៈ យើងបានបញ្ជាឲ្យក្រុមហ៊ុនបញ្ឈប់ការផលិត”។

ទោះបីជាយ៉ាងណាក៏ដោយ ក្រុមហ៊ុន Norris មិន​បាន​ឆ្លើយ​តប​ទៅ​នឹងសំណើសុំ​ការ​អត្ថាធិប្បាយឡើយ៕

ប្រែសម្រួល៖ Vann Vann

ប្រភព៖ CNA, Reuters

ចុចអាន៖ ឥណ្ឌា ហាមឃាត់ក្រុមហ៊ុនមួយទៀត ដែលផលិតស៊ីរ៉ូប៍ក្អក ផ្ទុកសារធាតុពុល បណ្តាលឲ្យកុមារស្លាប់