ថៃ ចេញច្បាប់តឹងអំឡុងបុណ្យសង្ក្រាន្ត អ្នកលក់ស្រាឲ្យមនុស្សអាយុក្រោម២០ឆ្នាំផឹក ក៏អាចមានទោស

ស្របពេលថ្ងៃចូលឆ្នាំថ្មីកាន់តែខិតជិតមកដល់, ប្រទេសថៃ បានចេញច្បាប់តឹងរ៉ឹង ដាក់ឲ្យអនុវត្តដើម្បីធានាថា កន្លែងលេងទឹកទូទាំងប្រទេស ត្រូវតែគ្មានគ្រឿងស្រវឹងដាច់ខាត ក្នុងអំឡុងពិធីបុណ្យសង្ក្រាន្ត ហើយអ្វីដែលគួរឲ្យកត់សម្គាល់គឺថា អ្នកបើកបរយានយន្តអាយុក្រោម២០ឆ្នាំ ដែលចាប់បានថាបើកបរក្រោមឥទ្ធិពលមានកម្រិតជាតិអាល់កុលក្នុងឈាមលើសពី២០មិល្លីក្រាម គឺនឹងត្រូវប្រឈមការស៊ើបអង្កេតដើម្បីរកមុខហាងដែលលក់ស្រាឲ្យពួកគេផឹក ហើយអ្នក​លក់ក៏​អាច​ទទួលទោសដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Bangkok Post នៅថ្ងៃពុធទី១៣ខែមីនា, គណៈកម្មាធិការគ្រប់គ្រងគ្រឿងស្រវឹងថៃ និយាយថា បម្រាមទាំងស្រុងលើគ្រឿងស្រវឹង នឹងត្រូវអនុវត្តនៅគ្រប់កន្លែងរៀបចំពិធីបុណ្យសង្ក្រាន្ត សម្រាប់រយៈពេលពិធីបុណ្យនេះទាំងមូល។

ការហាមប្រាមគ្រឿងស្រវឹង នឹងត្រូវបានអនុវត្តយ៉ាងតឹងរ៉ឹង ដោយមានការយកចិត្តទុកដាក់ជាពិសេសដើម្បីធានាថា អនីតិជនមិនអាចផឹកគ្រឿងស្រវឹងបានទេ ហើយការលក់នៅកន្លែងផ្សេងទៀត ក៏នឹងមិនអនុញ្ញាតផងដែរក្រោយផុតម៉ោងកំណត់។

វិធានការនេះ ត្រូវបានគេមើលឃើញថា មានគោលបំណងកាត់បន្ថយគ្រោះថ្នាក់ចរាចរណ៍ ព្រោះករណីភាគច្រើនគឺបណ្តាលមកពីការបើកបរក្នុងស្ថានភាពស្រវឹង ហើយម្យ៉ាងវិញទៀត អភិបាលខេត្តនិងអាជ្ញាធរមូលដ្ឋានទាំងឡាយ ត្រូវកំណត់តំបន់គ្មានគ្រឿងស្រវឹងសម្រាប់ពិធីបុណ្យសង្ក្រាន្ត ដើម្បីរក្សាសុវត្ថិភាព និងសណ្តាប់ធ្នាប់សាធារណៈ។

យោងតាមទិន្នន័យឆ្នាំមុន, ចាប់ពីថ្ងៃទី១១ដល់ថ្ងៃទី១៧ខែមេសា គ្រោះថ្នាក់ចរាចរណ៍ បានបណ្តាលឲ្យមនុស្សស្លាប់និងរបួសសរុប៤៣៤០នាក់ ក្នុងនោះមានអ្នកស្លាប់និងរបួស៥០២នាក់ គឺជាមនុស្សអាយុក្រោម២០ឆ្នាំ។

លើសពីនេះ វិធានការ​បង្ការ ​នឹង​ត្រូវ​បាន​ពង្រឹង​​ក្នុង​សហគមន៍​មូលដ្ឋាន ដើម្បី​បង្ការ​គ្រោះថ្នាក់ដែលបណ្តាលមកពីការ​បើកបរ​ក្នុង​ស្ថានភាព​ស្រវឹង ហើយប៉ុស្តិ៍ត្រួតពិនិត្យ ក៏នឹងត្រូវដាក់បន្ថែមផងដែរ ខណៈអ្នកបើកបររថយន្តនិង​​ម៉ូតូ ​ដែល​ជាប់​ពាក់ព័ន្ធ​គ្រោះថ្នាក់​ចរាចរណ៍​ នឹង​ត្រូវ​ទទួល​​ការ​ធ្វើតេស្ត​ឈាម ឬ​ដង្ហើម។

សូមបញ្ជាក់ថា ថ្ងៃឈប់សម្រាកផ្លូវការនៃពិធីបុណ្យសង្ក្រាន្តថៃ គឺចាប់ពីថ្ងៃទី១៣ដល់១៧ខែមេសា ប៉ុន្តែពិធីបុណ្យសង្ក្រាន្តពិភពលោក នឹងប្រព្រឹត្តទៅចាប់ពីថ្ងៃទី១ដល់២១ខែមេសា ដើម្បីជំរុញកំណើនទេសចរណ៍៕

អត្ថបទ៖ សុខ សុវណ្ណ

ចុចអាន៖ ថៃ ចុះថ្លៃសំបុត្រយន្តហោះ២០% អំឡុងពិធីបុណ្យសង្ក្រាន្ត