មនុស្សស្លាប់ បន្តកើនច្រើនឡើងៗ ក្នុងហេតុការណ៍ ភ្លើងឆេះក្លឹបនៅ ថៃ

ចំនួនមនុស្សស្លាប់ ក្នុងហេតុការណ៍ភ្លើងឆេះក្លឹប នៅទីក្រុងបាងកក ប្រទេសថៃ បានកើនឡើងបន្ថែមទៀតហើយ ដោយគិតត្រឹមព្រឹកថ្ងៃចន្ទ ទី២០ ខែកក្កដា ឆ្នាំ២០២៦ តួលេខបានហក់ដល់ ៣៤នាក់។

តាមការផ្សាយរបស់ Bangkok Post, អ្នកស្លាប់ចុងក្រោយ គឺជាស្រ្តីអាយុ២០ឆ្នាំ ដែលផុតដង្ហើមនៅមន្ទីរពេទ្យ ដោយសាររបួសធ្ងន់ធ្ងរពេក។

សរុបជារួម មនុស្ស ២៧នាក់ស្លាប់នៅកន្លែងកើតហេតុ និង ៧នាក់ទៀត ស្លាប់ក្នុងមន្ទីរពេទ្យ ហើយក្រៅពីនោះ មាន ៧០នាក់រងរបួស។ ក្នុងចំណោមអ្នករបួស មាន ១៣នាក់ របួសធ្ងន់, ៩នាក់មធ្យម និង ៤៨នាក់ស្រាល។

សូមជម្រាបជាថ្មី គ្រោះអគ្គិភ័យ បានឆាបឆេះក្លឹបកម្សាន្ត Rong Beer Na Ladphraoក្បែរផ្លូវ Soi Lat Phrao លេង 1 ក្នុងខ័ណ្ឌចតុចក្រ ទីក្រុងបាងកក នាវេលាម៉ោង ១២:០២ រំលងអធ្រាត្រ ឈានចូលថ្ងៃចន្ទ ទី១៣ ខែកក្កដា ឆ្នាំ២០២៦។

ក្រុមពន្លត់អគ្គិភ័យ បានឲ្យដឹងថា មានមនុស្សប្រហែល ៣០០នាក់ នៅក្នុងក្លឹប ពេលភ្លើងចាប់ផ្តើមឆាបឆេះ ខណៈមនុស្សស្លាប់ភាគច្រើន គឺបណ្តាលមកពីថប់ដង្ហើមព្រោះផ្សែង។

តាមការសន្និដ្ឋានជាបឋម, អគ្គិភ័យនេះ អាចបណ្តាលមកពីការទុស្សេ ព្រោះគេឃើញមានភ្លើងឆេះចេញពីប្រអប់ឌីសង់ទ័រ កន្លែងឆាកតន្ត្រី រួចក៏ដាច់ចរន្តអគ្គិភ័យ ហើយលាន់ស្នូរផ្ទុះទៀត៕

អត្ថបទ៖ សុវណ្ណ