កូរ៉េខាងត្បូង បញ្ជាឲ្យសម្លាប់លោក គីម ជុងអ៊ុន មុនគេ បើសង្គ្រាមផ្ទុះឡើង

តាមការចុះផ្សាយរបស់កាសែត Korean Times កាលពីថ្ងៃពុធទី១៣ខែមីនា, រដ្ឋមន្ត្រីក្រសួងការពារជាតិកូរ៉េខាងត្បូង លោក Shin Won-sik បានចេញបញ្ជាឲ្យសម្លាប់មេដឹកនាំកូរ៉េខាងជើង គីម ជុងអ៊ុន មុនគេ និងមន្ត្រីកំពូលៗរបស់ទីក្រុងព្យុងយ៉ាងដទៃទៀត ក្នុងករណីដែលសង្រ្គាមផ្ទុះឡើងជាថ្មី នៅឧបទ្វីបកូរ៉េ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងអំឡុងពេលចុះទៅពិនិត្យទីបញ្ជាការសង្គ្រាមពិសេសរបស់កងទ័ពកូរ៉េខាងត្បូងនៅទីក្រុង Incheon លោក Shin ប្រាប់ថា “ប្រសិនបើលោក គីម ជុងអ៊ុន ចាប់ផ្តើមសង្រ្គាម អ្នកត្រូវតែក្លាយជាអង្គភាពប្រតិបត្តិការពិសេសដ៏ខ្លាំងបំផុតរបស់ពិភពលោក ដើម្បីកម្ចាត់មេដឹកនាំសត្រូវឲ្យបានឆាប់រហ័ស”។

វោហាសាស្រ្តដ៏ក្តៅគគុកបែបនេះ ធ្វើឲ្យគេនឹកឃើញកាលពីដើមឆ្នាំ២០២៤ ដែលលោក គីម ជុងអ៊ុន បានប្រកាសក្តែងៗថា ប្រទេសកូរ៉េខាងត្បូង គឺជាសត្រូវធំបំផុតរបស់ទីក្រុងព្យុងយ៉ាង ហើយថែមទាំងព្រមានទៀតថា ប្រទេសនេះគ្មានចេតនាបញ្ចៀសសង្គ្រាមឡើយ។

លោកគីម បានប្រាប់ឲ្យកងទ័ពកូរ៉េខាងជើង ត្រូវពង្រឹងសមត្ថភាពការពារខ្លួន ហើយការយកអាវុធនុយក្លេអ៊ែរធ្វើជាវិធីសាស្រ្តកំញើញសត្រូវ គឺជាអទិភាពកំពូល។ លោកអះអាងថា ក្នុងករណីមានសង្គ្រាម កូរ៉េខាងជើង នឹងមិនស្ទាក់ស្ទើរឡើយ ក្នុងការប្រើគ្រប់មធ្យោបាយនិងកម្លាំងទាំងអស់ ដើម្បីកម្ទេចកូរ៉េខាងត្បូង។

សូមបញ្ជាក់ថា ដំណើររបស់លោក Shin ទៅទីបញ្ជាការកងកម្លាំងពិសេស គឺកើតឡើងចំពេល សមយុទ្ធយោធា “Freedom Shield” រវាងកូរ៉េខាងត្បូងជាមួយអាមេរិក កំពុងធ្វើកក្រើកមេឃកក្រើកដី។ ទោះបីជាយ៉ាងណាក៏ដោយ លោក គីម បាន​ហៅ​សមយុទ្ធ​រួម​នេះ​ថា ​ជា​ការ​ហាត់សម​សម្រាប់​ការ​ឈ្លានពាន​​កូរ៉េ​ខាងជើង និង​​បង្ក​សង្គ្រាម។

តាមសេចក្តីរាយការណ៍របស់ទីភ្នាក់ងារសារព័ត៌មាន Yonhap, នៅក្នុងសមយុទ្ធចុងក្រោយបង្អស់របស់កូរ៉េខាងត្បូងជាមួយកងទ័ពអាមេរិក, កងកម្លាំងពិសេសបានធ្វើការហ្វឹកហ្វឺនលើបេសកកម្មសំខាន់ៗជាច្រើន ខណៈទីក្រុងសេអ៊ូលនិយាយថា ខ្លួនកំពុងត្រៀមលក្ខណៈ ទប់ទ​ល់ជាមួយការបង្កហេតុផ្សេងៗពីកូរ៉េខាងជើង រួមទាំងការវាយប្រហារភេរវកម្មផងដែរ។

ភាព​តានតឹង​នៅ​ឧបទ្វីប​កូរ៉េ​ បានឡើងកម្តៅខ្លាំងកាលពីឆ្នាំមុន ចំ​ពេល​​ទីក្រុងព្យុងយ៉ាង បាញ់សាកល្បងមីស៊ីលមិនដកដៃ។ តាមពិតទៅ សង្រ្គាមកូរ៉េឆ្នាំ១៩៥០-១៩៥៣ បានបញ្ចប់ទៅដោយបទឈប់បាញ់ មិនមែនសន្ធិសញ្ញាសន្តិភាពឡើយ ដូចនេះមានន័យថា បើតាមបច្ចេកទេស កូរ៉េទាំង ២ នៅតែស្ថិតក្នុងស្ថានភាពសង្រ្គាមជាមួយគ្នាដដែល៕

អត្ថបទ៖ សុខ សុវណ្ណ

ចុចអាន៖ លោក គីម ជុងអ៊ុន បង្ហាញមុខ​សត្រូវធំបំផុតរបស់ កូរ៉េខាងជើង