លោក គីម ជុងអ៊ុន បង្ហាញមុខ​សត្រូវធំបំផុតរបស់ កូរ៉េខាងជើង

លោក គីម ជុងអ៊ុន មេដឹកនាំកូរ៉េខាងជើង បានប្រកាសក្តែងៗថា ប្រទេសកូរ៉េខាងត្បូង គឺជាសត្រូវធំបំផុតរបស់ទីក្រុងព្យុងយ៉ាង ហើយថែមទាំងព្រមានទៀតថា ប្រទេសនេះគ្មានចេតនាបញ្ចៀសសង្គ្រាមឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានោះ លោកគីម ក៏បានប្រាប់ឲ្យកងទ័ពកូរ៉េខាងជើង ត្រូវពង្រឹងសមត្ថភាពការពារខ្លួនផងដែរ ហើយការយកអាវុធនុយក្លេអ៊ែរធ្វើជាវិធីសាស្រ្តកំញើញសត្រូវ គឺជាអទិភាពកំពូល។

លោក​គីម ជុងអ៊ុន ប្រកាសបែបនេះ ពេលលោក​ចុះ​ពិនិត្យ​រោងចក្រ​សព្វាវុធ​ធំៗ​របស់​កូរ៉េ​ខាង​ជើងកាលពី​ថ្ងៃ​ទី ៨-៩ ខែ​មករា ខណៈលោកសម្តែងការពេញចិត្ត ដែលរោងចក្រនានា អាចផលិតអាវុធនិងឧបករណ៍ថ្មីៗ ហើយស្នើឲ្យពួកគេបង្កើនការត្រៀមខ្លួនប្រយុទ្ធផងដែរ។

លោកអះអាងថា ក្នុងករណីមានសង្គ្រាម កូរ៉េខាងជើង នឹងមិនស្ទាក់ស្ទើរឡើយ ក្នុងការប្រើគ្រប់មធ្យោបាយនិងកម្លាំងទាំងអស់ ដើម្បីកម្ទេចកូរ៉េខាងត្បូង។

សូមបញ្ជាក់ថា សង្រ្គាមឆ្នាំ១៩៥០ ដល់ឆ្នាំ១៩៥៣ បានបញ្ចប់ទៅដោយបទឈប់បាញ់ មិនមែនសន្ធិសញ្ញាសន្តិភាពឡើយ ដូចនេះមានន័យថា បើតាមបច្ចេកទេស កូរ៉េទាំង ២ នៅតែស្ថិតក្នុងស្ថានភាពសង្រ្គាមជាមួយគ្នាដដែល។

កាលពីសប្តាហ៍មុន កូរ៉េខាងត្បូង ចោទប្រកាន់កូរ៉េខាងជើងថា បានបន្តបាញ់ផ្លោងលើដែនទឹកជុំវិញកោះ Yeonpyeong ដោយសង្កត់ធ្ងន់ថា នេះគឺជាទង្វើបង្កហេតុដែលបង្កើនភាពតានតឹង។

ក្រោយមកលោកស្រី Kim Yo-jong ត្រូវជាប្អូនស្រីរបស់មេដឹកនាំ គីម ជុងអ៊ុន បានបញ្ជាក់ថា យោធាកូរ៉េខាងជើងនឹងឆ្លើយតបភ្លាមៗចំពោះរាល់សកម្មភាពបង្កហេតុទាំងអស់៕

ប្រែសម្រួល៖ Vann Vann

ប្រភព៖ VN Express

ចុចអាន៖ កូរ៉េខាងត្បូង គំរាមកម្ទេច កូរ៉េខាងជើង ឲ្យហិនហោច