ហ្វីលីពីន បង្កើនសន្តិសុខដែនសមុទ្រ ចំពេលមានភាពតានតឹងជាមួយ ចិន

ប្រធានាធិបតីហ្វីលីពីនលោក Ferdinand Marcos Jr. បានប្រាប់រដ្ឋាភិបាលរបស់លោកឲ្យពង្រឹងសន្តិសុខដែនសមុទ្របន្ថែម ចំពេលមានភាពតានតឹងជាមួយប្រទេសចិន ។ នេះបើយោងតាមការចេញផ្សាយដោយទូរទស្សន៍ជាតិជប៉ុន NHK នៅថ្ងៃទី២ ខែមេសានេះ ។

ក្រោមបទបញ្ជាប្រតិបត្តិរបស់លោក Marcos ដែលបានចុះហត្ថលេខាកាលពីថ្ងៃទី២៥ ខែមីនា និងត្រូវបានប្រកាសកាលពីថ្ងៃអាទិត្យសប្ដាហ៍មុនដោយការិយាល័យប្រធានាធិបតី, អង្គភាពឃ្លាំមើលឆ្នេរសមុទ្រនឹងត្រូវបានរៀបចំឡើងវិញដើម្បីដាក់បញ្ចូលទៅក្នុងក្រុមប្រឹក្សាដែនសមុទ្រជាតិដែលទើបតែនឹងបង្កើតថ្មី ហើយក្រុមប្រឹក្សានេះទៀតសោតនឹងក្លាយជាស្ថាប័នកណ្តាលសម្រាប់ធានាសន្តិសុខដែនសមុទ្រ ។

ចំណែកសមាជិកនៅក្នុងក្រុមប្រឹក្សាក៏នឹងត្រូវបានពង្រីកបន្ថែមផងដែរ ហើយកងកម្លាំងប្រដាប់អាវុធនៃប្រទេសហ្វីលីពីនស្ថិតក្នុងចំណោមភ្នាក់ងារចាំជួយគាំទ្រចំនួន ១៣ អង្គភាព ខណៈបទបញ្ជានេះកើតឡើង នៅពេលជម្លោះដែនទឹករវាងក្រុងម៉ានីល និងក្រុងប៉េកាំងនៅសមុទ្រចិនខាងត្បូងកាន់តែតានតឹង ។

គួរបញ្ជាក់ថា ភាព​តានតឹង​រវាង​ហ្វីលីពីន ​និង​ចិន​បាន​និង​កំពុង​កើនឡើង​នាពេល​ថ្មីៗ​នេះ​ ខណៈកាលពីខែមុន មានការប៉ះទង្គិចរហូតដល់ទៅ ២ ដង ពោលកប៉ាល់ឆ្មាំឆ្នេរសមុទ្រចិនបានប្រើកាណុងបាញ់ទឹកទៅលើកប៉ាល់ផ្គត់ផ្គង់ហ្វីលីពីន ដែលធ្វើឲ្យនាវិករបស់ខ្លួនរងរបួស ហើយនេះក៏ជាឫសគល់ថ្មីមួយទៀតដែលធ្វើឲ្យមានភាពតានតឹងរវាងប្រទេសទាំងពីរកាន់តែក្ដៅបន្ថែមទៀត ៕

អត្ថបទ ៖ ប៊ុន សុភាព