ខេត្តថៃ ជាប់ដងទន្លេមេគង្គ ប្រកាសអាសន្ន ក្រោយអាស៊ីត ៣០តោន ធ្លាយចូលទន្លេនៅឡាវ

ខេត្តថៃចំនួន៧នៅជាប់ដងទន្លេមេគង្គ បានប្រកាសអាសន្ននិងព្រមានប្រជាពលរដ្ឋឲ្យប្រុងប្រ​យ័ត្នខ្ពស់ ព្រោះថា ប៉ុន្មានថ្ងៃមុននេះ មានហេតុការណ៍គ្រោះថ្នាក់ចរាចរណ៍រថយន្តដឹកអាស៊ីត៣០តោន ក្រឡាប់កំពប់ជះសារធាតុនេះចូលក្នុងទន្លេ Nam Khan នៃប្រទេសឡាវ ហើយគេរំពឹ​ងថា អាស៊ីតស៊ុលហ្វួរិច នឹងហូរចាក់ចូលទន្លេមេគង្គមកដល់ប្រទេសថៃ ក្នុងសប្តាហ៍នេះ។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋាភិបាល​ថៃ កំពុង​តាម​ដាន​រឿងនេះយ៉ាងយកចិត្តទុកដាក់បំផុត បន្ទាប់ពីគ្រោះថ្នាក់ចរាចរណ៍នៅទីក្រុង Luang Prabang នៃប្រទេសឡាវ កាលពីថ្ងៃពុធសប្តាហ៍មុន។

ពាក់ព័ន្ធបញ្ហានេះ ការិយាល័យធនធានទឹកជាតិ បានជូនដំណឹងដល់ខេត្តចំនួន៧នៅតាមដងទន្លេមេគង្គ ដូចជា Loei, Nong Khai, Bueng Kan, Nakhon Phanom, Mukdahan, Amnat Charoen និង Ubon Ratchathani ត្រូវតាមដានគុណភាពទឹកទន្លេមេគង្គឲ្យមែនទែន។

លោកស្រី Supamas Isarabhakdi រដ្ឋមន្ត្រីក្រសួងស្រាវជ្រាវវិទ្យាសាស្ត្រឧត្តមសិក្សា និងនវានុវត្តន៍ បានឲ្យដឹងថា លោកស្រីណែនាំដល់ក្រុមឆ្លើយតបបន្ទាន់ មកពីនាយកដ្ឋានសេវាកម្មវិទ្យាសាស្ត្រ ដើម្បីគាំទ្រដល់កិច្ចខិតខំប្រឹងប្រែងត្រួតពិនិត្យគុណភាពទឹកទន្លេ ក្នុងខេត្តទាំងប្រាំពីរខាងលើ និងវាយតម្លៃផលប៉ះពាល់លើបរិស្ថាន។

ស្របពេលជាមួយគ្នានោះ អាជ្ញាធរ​ថៃ​ បាន​ទាក់ទង​មន្ត្រី​ឡាវ ឲ្យ​បង្ហូរ​ទឹក​ចេញ​ពី​ទំនប់ Xayaburi ដើម្បី​កាត់បន្ថយជាតិ​គីមី​ក្នុង​ទន្លេ ក៏ដូចជាផល​ប៉ះពាល់​ដល់​គុណភាព​ទឹក ​នៅប្រទេសថៃ។

ពេលនេះ មន្ត្រីសុខាភិបាលថៃ ក៏បានចុះអប់រំប្រជាពលរដ្ឋនៅតាមបណ្តាខេត្តជាប់ទន្លេទាំង៧ អំពីរបៀបការពារខ្លួនពីគ្រោះថ្នាក់នៃសារធាតុគីមីផងដែរ ហើយប្រសិនបើពួកគេប៉ះនឹងទឹកដែលមានសារធាតុបំពុល ត្រូវណែនាំឲ្យទៅជួបគ្រូពេទ្យជាបន្ទាន់។

សូមបញ្ជាក់ថា អាស៊ីតស៊ុលហ្វួរិច គឺជាសារធាតុបំផ្លាញស្បែក ភ្នែក ធ្មេញ និងសួត ហើយបើប៉ះពាល់ធ្ងន់ធ្ងរ វាអាចបណ្តាលឲ្យងងឹតភ្នែកនិងឈានដល់បាត់បង់ជីវិតទៀតផង៕

អត្ថបទ៖ សុខ សុវណ្ណ

ចុចអាន៖ បុរសថៃ ដាច់សរសៃឈាមខួរក្បាលស្លាប់ ព្រោះផឹកស្រា ទាំងពេលមេឃកំពុងក្តៅខ្លាំង