ថៃ ត្រៀមទទួលយកជនភៀសខ្លួន មីយ៉ាន់ម៉ា ១០ ម៉ឺននាក់​

រដ្ឋមន្ត្រីការបរទេសថៃបាននិយាយកាលពីថ្ងៃអង្គារថា ប្រទេសថៃបានត្រៀមខ្លួនរួចជាស្រេចដើម្បីទទួលយកមនុស្សចំនួន ១០០,០០០ នាក់ដែលភៀសខ្លួនចេញពីប្រទេសមីយ៉ាន់ម៉ា ខណៈការប្រយុទ្ធគ្នានៅជិតទីក្រុងព្រំដែននៅតែបន្តផ្ទុះឡើង ។ នេះបើយោងតាមការចេញផ្សាយរបស់សារព័ត៌មាន CNA កាលពីថ្ងៃទី​៩ ខែមេសាកន្លងទៅ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីការបរទេសថៃលោក Parnpree Bahiddha-nukara បាននិយាយថា ថៃបានរៀបចំកន្លែងអស់ហើយដើម្បីត្រៀមផ្ទុកមនុស្សប្រហែល ១០០,០០០ នាក់នៅក្នុងតំបន់សុវត្ថិភាពបណ្តោះអាសន្នរបស់ថៃ ខណៈក្នុងរយៈពេលប៉ុន្មានខែថ្មីៗនេះ កងទ័ពមីយ៉ាន់ម៉ាប្រឈមមុខនឹងការគំរាមកំហែងដ៏អាក្រក់បំផុតរបស់ខ្លួន ជាពិសេសគឺការបាញ់បោះពីសំណាក់ក្រុមប្រឆាំងយោធានៅក្នុងប្រទេស ។

ប្រទេសថៃមិនមែនជាប្រទេសហត្ថលេខីនៃអនុសញ្ញាស្តីពីជនភៀសខ្លួនរបស់អង្គការសហប្រជាជាតិ ហើយមិនបែងចែករវាងជនភៀសខ្លួន និងជនចំណាកស្រុកផ្សេងទៀតនោះឡើយ ។ ប្រទេសនេះមានព្រំដែនប្រវែង ២,៤០០ គីឡូម៉ែត្រជាមួយប្រទេសមីយ៉ាន់ម៉ា ដែលកំពុងជាប់គាំងនៅក្នុងសង្រ្គាមស៊ីវិល ចាប់តាំងពីរដ្ឋាភិបាលយោធាបានផ្តួលរលំរដ្ឋាភិបាលជាប់ឆ្នោតតាមបែបប្រជាធិបតេយ្យនៅឆ្នាំ ២០២១ ។

គួរបញ្ជាក់ថា ការកើនឡើងជាលំដាប់នៃការប្រយុទ្ធគ្នានៅតាមព្រំដែនរវាង ថៃ-មីយ៉ាន់ម៉ា បានធ្វើឲ្យមនុស្សមួយចំនួនបានភៀសខ្លួនជាបណ្ដោះអាសន្នទៅកាន់ប្រទសថៃ ហើយបញ្ហានេះបានធ្វើនាយក​រដ្ឋមន្ត្រី​ សេដ្ឋា ថាវីស៊ីន មានការព្រួយបារម្ភ ប្រសិនបើស្ថានការណ៍កាន់តែអាក្រក់ទៅៗ ខណៈលោកក៏បានជួបពិភាក្សាគ្នាអំពីបញ្ហាព្រំដែនជាមួយ​មន្ត្រី​ជាន់​ខ្ពស់​ថៃកាលពីថ្ងៃអង្គារកន្លងទៅផងដែរ ។

ទោះបីជាយ៉ាងណាក៏ដោយ ចាប់តាំងពីទសវត្សរ៍ឆ្នាំ ១៩៨០ ថៃបានអនុញ្ញាតឲ្យជនភៀសខ្លួនរាប់ម៉ឺននាក់ចេញពីប្រទេសមីយ៉ាន់ម៉ា ឲ្យស្នាក់នៅក្នុងតង់បណ្ដោះអាសន្នក្បែរព្រំដែនរវាងប្រទេសទាំងពីរផងដែរ ៕

អត្ថបទ ៖ ប៊ុន សុភាព