ព័ត៌មានអន្ដរជាតិ
តួកគី ប្រកាសផ្អាកសកម្មភាពពាណិជ្ជកម្មទាំងអស់ជាមួយអ៉ីស្រាអ៊ែល
រដ្ឋាភិបាលតួកគី បានប្រកាសបញ្ឈប់រាល់សកម្មភាពការនាំចូល និងលក់ចេញទៅកាន់ប្រទេសអ៉ីស្រាអ៊ែល ក្រោមហេតុផលថា ការវាយលុកយោធានៅតែបន្តកើតមានដដែលនៅក្នុងតំបន់កាហ្សា។ វិធានការនេះ នឹងបន្តរហូតដល់ប្រទេសអ៉ីស្រាអ៊ែលយល់ព្រមអនុញ្ញាតឲ្យមានលំហូរជំនួយមនុស្សធម៌ទៅកាន់តំបន់រងគ្រោះនៅកាហ្សា។
ក្រសួងពាណិជ្ជកម្មតួកគី បានលើកឡើងកាលពីថ្ងៃទី២ ខែឧសភា នេះ ថា ការបញ្ឈប់ពាណិជ្ជកម្មជាមួយអ៉ីស្រាអ៊ែល គឺសំដៅទៅលើការនាំចូល និងលក់ចេញផលិតផលគ្រប់ប្រភេទទាំងអស់តែម្ដង មិនលើកលែងចំពោះផលិតផលណាមួយនោះទេ។ បន្ថែមពីនេះ មន្ត្រីតួកគី ក៏នឹងចាប់ដៃសហការជាមួយអាជ្ញាធរប៉ាឡេស្ទីន ដើម្បីធានាបានថា ពលរដ្ឋប៉ាឡេស្ទីននឹងមិនទទួលរងផលប៉ះពាល់ នៃការបញ្ឈប់ភាពជាដៃគូពាណិជ្ជកម្មជាមួយអ៉ីស្រាអ៊ែលនោះឡើយ។
ក្រសួងពាណិជ្ជកម្មតួកគី បានបន្ថែមថា នេះគឺជាវិធានការប្រឆាំងអ៉ីស្រាអ៊ែលលើកទី២ហើយ ដែលកាលពីខែមេសាមុន តួកគីធ្លាប់បានរឹតបន្តឹងការនាំចេញផលិតផលចំនួន ៥៤ប្រភេទទៅអ៉ីស្រាអ៊ែល ដែលមានដូចជា អាលុយមីញ៉ូម ដែក សម្ភារៈសំណង់ និងជីគីមី ជាដើម។
ទាក់ទិននឹងវិធានការនេះ រដ្ឋមន្ត្រីក្រសួងការបរទេសអ៉ីស្រាអ៊ែលលោក Israel Katz បានថ្លែងថា ប្រធានាធិបតីតួកគី កំពុងតែបំពានកិច្ចព្រមព្រៀងទ្វេភាគី ដោយបិទកំពង់ផែមិនឲ្យមានការនាំចូល និងលក់ចេញទៅកាន់អ៉ីស្រាអ៊ែល។ លោក Katz បន្តថា លោកបានណែនាំមន្ត្រីរបស់ខ្លួនឲ្យចូលរួមភ្លាមៗជាមួយភាគីពាក់ព័ន្ធនៅក្នុងរដ្ឋាភិបាល ដើម្បីបង្កើតជម្រើសពាណិជ្ជកម្មផ្សេងជំនួសឲ្យការសហការជាមួយតួកគី ដោយផ្ដោតសំខាន់លើផលិតកម្មក្នុងស្រុក និងការនាំចូលពីប្រទេសដទៃ។
គួររំឭកថា ទំនាក់ទំនងការទូតផ្លូវការរវាងតួកគី និងអ៉ីស្រាអ៊ែល បានចាប់ផ្ដើមតាំងពីឆ្នាំ១៩៤៩មកម៉្លេះ។ ប៉ុន្តែចាប់ពីអាណត្តិក្រោមការដឹកនាំរបស់លោក Recep Tayyip Erdogan ភាពតានតឹងបានលេចចេញឡើងបន្តិចម្ដងៗនៅក្នុងចំណងសម្ព័ន្ធភាពរវាងប្រទេសទាំង២។ ប្រធានាធិបតីតួកគី បានចេញមុខរិះគន់ចំៗទៅលើអ៉ីស្រាអ៊ែល ក្រោយមានការវាយប្រហារយោធានៅកាហ្សា ហើយចោទប្រកាន់អ៉ីស្រាអ៊ែលថាបានប្រព្រឹត្តឧក្រិដ្ឋកម្មសង្គ្រាម និងការប្រល័យពូជសាសន៍៕
ដោយ៖ ឈាង
-
សេចក្ដីជូនដំណឹង៧ ថ្ងៃ agoក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា
-
ព័ត៌មានអន្ដរជាតិ៥ ថ្ងៃ agoអស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ
-
កីឡា១ ថ្ងៃ agoល្ងាចនេះ U19 កម្ពុជា ប៉ះ ថៃ វគ្គពាក់កណ្តាលផ្តាច់ព្រ័ត្រ ខណៈជួបគ្នាចុងក្រោយ ថៃ ខកចិត្តម្តងហើយ
-
ព័ត៌មានអន្ដរជាតិ៦ ម៉ោង agoឥណ្ឌា តវ៉ាយ៉ាងខ្លាំង ចំពោះអាមេរិកដែលវាយប្រហារនាវាដឹកប្រេងបណ្តាលនាវិកឥណ្ឌា ៣នាក់ស្លាប់
-
សេដ្ឋកិច្ច១ សប្តាហ៍ agoធនាគារ ARDB ចាក់បញ្ចូលទុនលើស្វាយចន្ទី និងដំឡូងមី
-
ព័ត៌មានជាតិ១ សប្តាហ៍ agoកម្ពុជា ថោ្កលទោសយោធាថៃយ៉ាងខ្លាំងក្លាដែលដុតបំផ្លាញជណ្តើរឡើងប្រាសាទខ្នារ ទីតាំងបេតិកភណ្ឌវប្បធម៌
-
សន្តិសុខសង្គម៦ ថ្ងៃ agoចុះពិនិត្យរដ្ឋបាល អគារ The Bridge ខណ្ឌចំការមន រកឃើញជនបរទេស ៤ នាក់ ស្នាក់នៅខុសច្បាប់ និង ដកហូតគ្រឿងញៀនជាង ៦៥ គីឡូក្រាម
-
ព័ត៌មានអន្ដរជាតិ១ សប្តាហ៍ agoពូទីន គេចមិនឆ្លើយរឿងកាន់អំណាចដល់ឆ្នាំ២០៣៦ ហើយប្រាប់ថា «មានតែព្រះទេទើបដឹង»