លោក ត្រាំ មានយុទ្ធសាស្ត្រពន្លត់ភ្លើងសង្គ្រាមនៅ អ៊ុយក្រែន តែសុំលាក់សិន

អតីតប្រធានាធិបតីសហរដ្ឋអាមេរិកលោក ដូណាល់ ត្រាំ បានបង្កើតផែនការយុទ្ធសាស្ត្រមួយស្ដីពីការដោះស្រាយ ក៏ដូចជាពន្លត់ភ្លើងសង្គ្រាមនៅអ៊ុយក្រែនដោយសន្តិវិធី ប៉ុន្តែលោកសូមលាក់សិនរហូតទាល់តែការបោះឆ្នោតប្រធានាធិបតីខិតជិតមកដល់ ។ នេះបើយោងតាមការចេញផ្សាយដោយទីភ្នាក់ងារព័ត៌មាន TASS កាលពីថ្ងៃទី៣ ខែឧសភាកន្លងទៅ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីប្រភពដែលសុំមិនបញ្ចេញឈ្មោះដែលស្និទ្ធនឹងអ្នកនយោបាយរូបនេះបានឲ្យដឹងថា “លោក ត្រាំ មានផែនការលម្អិតមួយទាក់ទងនឹងដំណោះស្រាយស្ដីពីជម្លោះនៅអ៊ុយក្រែន ប៉ុន្តែគាត់នឹងមិនបង្ហើបប្រាប់ទៅកាន់អ្នកសារព័ត៌មានឡើយ ព្រោះថាប្រសិនបើវាធ្លាយចេញ នោះវានឹងលែងមានឥទ្ធិពល ដូច្នេះគាត់នឹងមិនបង្ហាញវានោះទេរហូតការបោះឆ្នោតមកដល់” ។

ប្រភពដដែលបញ្ជាក់ទៀតថា លោក ត្រាំ មានសារដ៏សាមញ្ញមួយ ប៉ុន្តែមានខ្លឹមសារគ្រប់គ្រាន់ដែលនឹងឈានដល់ការពន្លត់ភ្លើងសង្គ្រាម ហើយនេះក៏អាចជាយុទ្ធសាស្ត្រដ៏លម្អិតមួយរបស់អតីតប្រធានាធិបតីរូបនេះផងដែរក្នុងការទាក់ទាញសន្លឹកឆ្នោតពីអ្នកបោះឆ្នោតអាមេរិក ។

បើទោះបីជាលោក ត្រាំ មិនបង្ហើបប្រាប់ពីផែនការយុទ្ធសាស្ត្រដើម្បីពន្លត់ភ្លើងសង្គ្រាមនៅអ៊ុយក្រែននាពេលនេះក៏ដោយ ប៉ុន្តែកាលពីចុងខែមេសា អតីតប្រធានាធិបតីវ័យ ៧៨ ឆ្នាំរូបនេះបានថ្លែងនៅក្នុងបទសម្ភាសន៍ជាមួយសារព័ត៌មាន The Time ថា លោកនឹងមិនហុចជំនួយទៅឲ្យរដ្ឋាភិបាលទីក្រុងកៀវនោះទេ ប្រសិនបើលោកជាប់ឆ្នោត ។

នេះមិនមែនជាលើកទីមួយឡើយដែលលោក ដូណាល់ ត្រាំ ប្រកាសពីផែនការយុទ្ធសាស្ត្រក្នុងការពន្លត់ភ្នក់ភ្លើងសង្គ្រាមនៅអ៊ុយក្រែន ពោលកាលពីឆ្នាំមុន អតីតប្រធានាធិបតីទី ៤៥ របស់អាមេរិករូបនេះធ្លាប់បានអួតថា លោកនឹងចរចាបញ្ចប់សង្គ្រាមរវាងរុស្ស៊ី និងអ៊ុយក្រែនដោយប្រើពេលត្រឹមតែ ២៤ ម៉ោងប៉ុណ្ណោះ ជាពិសេសជម្លោះមួយនេះនឹងមិនលេចរូបរាងឡើយ ប្រសិនបើលោកឈ្នះការបោះឆ្នោតកាលពីឆ្នាំ ២០២០ កន្លងទៅ ។

គិតត្រឹមពេលនេះ ភ្លើងសង្គ្រាមរវាងរុស្ស៊ី និងអ៊ុយក្រែនបានចាយពេល ២ ឆ្នាំហើយ បន្ទាប់ពីកងកម្លាំងរដ្ឋាភិបាលទីក្រុងមូស្គូលើកទ័ពចូលទីក្រុងកៀវកាលពីថ្ងៃទី២៤ ខែកុម្ភៈ ឆ្នាំ២០២២ ខណៈបច្ចុប្បន្នលោកប្រធានាធិបតី Zelensky នៅតែបន្តដើរសុំជំនួយ ក៏ដូចជាសព្វាវុធ និងកែនទាហានជាបន្តបន្ទាប់ពីសម្ព័ន្ធមិត្តសំខាន់ៗដូចជា អឺរ៉ុប និងអាមេរិកជាដើម ។

ទោះបីជាមិនមានព័ត៌មានច្បាស់លាស់អំពីចំនួនអ្នកស្លាប់ និងរបួសក៏ដោយ ប៉ុន្តែតាមការប៉ាន់ប្រមាណរបស់អង្គការសហប្រជាជាតិបានឲ្យដឹងថា ជនស៊ីវិលអ៊ុយក្រែនជាង ១០,០០០ នាក់ត្រូវបានសម្លាប់ ខណៈយោងតាមរបាយការណ៍របស់កាសែត New York Times វិញបានអះអាងថា រហូតមកដល់ពេលនេះទាំងទាហានអ៊ុយក្រែន និងរុស្ស៊ីសរុបចូលគ្នាគឺមានជាង ៥ លាននាក់បានស្លាប់បាត់បង់ជីវិត ៕

ដោយ ៖ សុខ ជីវ័ន្ត

ចុចអាន ៖ អង់គ្លេស បើកដៃឲ្យ អ៊ុយក្រែន ប្រើអាវុធរបស់ខ្លួនវាយប្រហារក្នុងទឹកដី រុស្ស៊ី