ព័ត៌មានអន្ដរជាតិ

អេហ្ស៊ីប ចូលដៃជាមួយអាហ្វ្រិកខាងត្បូង ក្នុងបណ្ដឹងប្រល័យពូជសាសន៍ប្រឆាំងនឹងអ៊ីស្រាអែល

បានផុស

២ years មុន

នៅ

ថ្ងៃអង្គារ ១៤ ឧសភា ២០២៤

ដោយ

Chheang

អេហ្ស៊ីប ដែលជាប្រទេសមួយក្នុងចំណោមអ្នកសម្របសម្រួលការចរចាសន្តិភាពនៅតំបន់កាហ្សា បានសម្រេចចិត្តចាប់ដៃជាមួយអាហ្វ្រិកខាងត្បូង នៅក្នុងបណ្ដឹងប្រឆាំងអ៊ីស្រាអែល ពាក់ព័ន្ធនឹងអំពើប្រល័យពូជសាសន៍ ដែលធ្វើឡើងនៅក្នុងតុលាការយុត្តិធម៌អន្តរជាតិ។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Reuters នៅថ្ងៃទី១៣ ខែឧសភា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការបរទេសអេហ្ស៊ីប បានលើកឡើងថា ខ្លួននឹងចូលអន្តរាគមន៍ចំពោះបញ្ហាដែលអ៊ីស្រាអែល បានបង្កើនប្រតិបត្តិការយោធាកាន់តែសម្បើមដៃនៅកាហ្សា ជាពិសេសនោះគឺនៅត្រង់តំបន់ Rafah កាលពីពេលថ្មីៗកន្លងទៅ។ ក្រសួងការបរទេសអេហ្ស៊ីប បានបន្ថែមថា “សេចក្ដីប្រកាសនៃអន្តរាគមន៍ក្នុងករណីនេះ កើតឡើងដោយសារការមើលឃើញពីការពង្រីកវិសាលភាព និងទំហំនៃការរំលោភបំពានរបស់អ៊ីស្រាអែលប្រឆាំងទៅនឹងជនស៊ីវិលនៅកាហ្សា”។

ភាពតានតឹងរវាងអ៊ីស្រាអែល និងអេហ្ស៊ីប បានកើនកម្ដៅគួរឲ្យកត់សម្គាល់ ជាពិសេសនោះគឺតាមតំបន់ព្រំដែន បន្ទាប់ពីអ៊ីស្រាអែល បានធ្វើប្រតិបត្តិការនិងបង្កើនវត្តមានយោធារបស់ខ្លួននៅតាមតំបន់ Rafah ដែលជាព្រំដែនជាប់គ្នាជាមួយប្រទេសអេហ្ស៊ីបផងដែរនោះ។ បើតាមការបង្ហើបពីភ្នាក់ងារសន្តិសុខជាតិអេហ្ស៊ីបទៅកាន់ទីភ្នាក់ងារព័ត៌មាន Reuters បានឲ្យដឹងថា មន្ត្រីអេហ្ស៊ីបបាននាំគ្នាស្ដីបន្ទោសអ៊ីស្រាអែលជាខ្លាំង ជុំវិញរឿងបំផ្លាញកិច្ចប្រឹងប្រែងចរចាសន្តិភាពនៅក្នុងទីក្រុង Cairo និងការបង្កើនភាពតានតឹងនៃចំណងទ្វេភាគីរវាងប្រទេសទាំង២ ដែលនេះសុទ្ធតែបង្កឡើងដោយភាគីអ៊ីស្រាអែលតែម្ខាង៕

ដោយ៖ ឈាង