ព័ត៌មានអន្ដរជាតិ

កូរ៉េខាងត្បូង ដាក់ទណ្ឌកម្មក្រុងព្យុងយ៉ាង និងនាវារុស្ស៊ី២គ្រឿង

បានផុស

៧ ថ្ងៃ មុន

នៅ

ថ្ងៃសុក្រ ២៤ ឧសភា ២០២៤

ដោយ

រដ្ឋាភិបាលក្រុងសេអ៊ូល នៅថ្ងៃទី២៤ ខែឧសភានេះ បានដាក់ទណ្ឌកម្មលើជនជាតិកូរ៉េខាងជើងចំនួន ៧នាក់ និងនាវារុស្ស៊ីចំនួន ២គ្រឿង ជុំវិញការជួញដូរអាវុធ និងសកម្មភាពខុសច្បាប់រវាងសម្ព័ន្ធមិត្តទាំង២ ដែលបានរំលោភលើសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។

លោក គីម ជុងអ៊ុន មេដឹកនាំកូរ៉េខាងជើង និងលោក វ៉្លាឌឺមៀ ពូទីន មេដឹកនាំរុស្ស៊ី (រូបភាព៖ AFP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការបរទេសកូរ៉េខាងត្បូង បានប្រាប់ថា នាវារុស្ស៊ីទាំង២គ្រឿង បានដឹកកុងតឺន័រជាច្រើន ដើម្បីផ្លាស់ប្ដូរសព្វាវុធយោធារវាងក្រុងព្យុងយ៉ាង និងក្រុងម៉ូស្គូ ដែលបង្ហាញច្បាស់ៗក្រឡែតពីការបំពាននឹងការដាក់ទណ្ឌកម្មរបស់អង្គការ UN។ ដោយឡែកចំពោះបុគ្គលទាំង៧នាក់របស់កូរ៉េខាងជើងដែលត្រូវរងទណ្ឌកម្ម មានម្នាក់ធ្វើជាតំណាងក្រុមហ៊ុនរដ្ឋមានមូលដ្ឋាននៅស៊ីរី បានចរចាជួញដូរអាវុធជាមួយក្រុមហ៊ុនរដ្ឋរុស្ស៊ី Wagner Group នៅចន្លោះឆ្នាំ២០២២ និងឆ្នាំ២០២៣។

រីឯបុគ្គលម្នាក់ទៀត ជាប់ពាក់ព័ន្ធនឹងការនាំចេញប្រេងពីរុស្ស៊ីចូលទៅកាន់កូរ៉េខាងជើង។ នៅសល់៥នាក់ទៀតគឺបានធ្វើជាអ្នកជំនាញ IT លួចរកលុយពីបរទេសមកជួយផ្គត់ផ្គង់មូលនិធិគាំទ្រកម្មវិធីអភិវឌ្ឍមីស៊ីល និងនុយក្លេអ៊ែររបស់កូរ៉េខាងជើង។

សូមបញ្ជាក់ថា សហរដ្ឋអាមេរិក និងកូរ៉េខាងត្បូង សុទ្ធតែបានចោទប្រកាន់កូរ៉េខាងជើងថាលួចដឹកអាវុធឲ្យទៅរុស្ស៊ី ដើម្បីយកទៅប្រើក្នុងសង្គ្រាមប្រយុទ្ធជាមួយអ៊ុយក្រែន។ យ៉ាងណាមិញ រដ្ឋាភិបាលក្រុងព្យុងយ៉ាង និងក្រុងម៉ូស្គូ បានច្រានចោលនូវរាល់ការចោទប្រកាន់ទាំងនោះ។

កាលពីដើមឆ្នាំ២០២៤នេះ ក្រុមអ្នកជំនាញអង្គការ UN បានសម្គាល់ថា ទណ្ឌកម្មដែលដាក់លើកូរ៉េខាងជើងត្រូវទទួលបរាជ័យ ដោយសារតែការជំទាស់មិនសហការពីរុស្ស៊ី។ ហេតុដូច្នេះហើយទើបអាមេរិក និងសម្ព័ន្ធមិត្តរបស់ខ្លួន បានជំរុញឲ្យមានការកែសម្រួលលើទណ្ឌកម្មទាំងនោះ៕

ដោយ៖ ឈាង